Qadın gecə klubunda qısqanclıq zəminində 3 nəfəri yaraladı - VİDEO

İstanbulun Taksim bölgəsində yerləşən İstiqlal küçəsindəki gecə klubunda qısqanclıq zəminində baş verən bıçaqlı hücumda üç nəfər yaralanıb.

Sonxeber.az türk mediasına istinadən xəbər verir ki, hadisə 26 iyul, şənbə günü saat 04:00 radələrində baş verib. Məlumata görə, H.Ç. adlı qadın sevgilisi Ö.B. ilə birlikdə gecə klubuna gəlib. Onlar əylənərkən M.Ü. adlı başqa bir qadın Ö.B.-yə yaxınlıq göstərib. Bu vəziyyətdən narahat olan H.Ç. qısqanclıq krizinə girib.

Klubda başlayan mübahisə küçədə davam edib. Əlindəki bıçaqla hücuma keçən H.Ç., qısqandığı qadın M.Ü.-nü, sevgilisi Ö.B.-ni və davaya müdaxilə edən C.A.-nı yaralayıb.

Polis qrupları hadisədən sonra araşdırma apararaq qadının kimliyini müəyyənləşdirib. H.Ç. hadisədə istifadə etdiyi bıçaqla birlikdə saxlanılıb. Polis bölməsində verdiyi ifadəsində "Sevgilimi qısqandığım üçün etdim" deyən H.Ç., məhkəmənin qərarı ilə "qəsdən yaralama" ittihamı üzrə həbs olunaraq cəzaçəkmə müəssisəsinə göndərilib.

Telegramda izləyin