Qadın qonşusunun açarını gizlicə kopyalayaraq evdəki bütün qızılları oğurladı

Türkiyənin Samsun vilayətinin Atakum rayonunda 26 yaşlı qadın, qonşusunun ev açarını gizlicə kopyalayaraq 1 milyon 700 min lirə dəyərində qızıl zinət əşyası oğurlayıb.

Sonxeber.az türk mediasına istinadən xəbər verir ki, hadisə Atakent məhəlləsində baş verib. Zərərçəkən Enes B. (33) və həyat yoldaşı Özge B. (33) evlərində saxladıqları bilərzik, qram qızıl, çeyrek qızıl və brilliant üzük kimi ümumi dəyəri 1 milyon 700 min lirə olan zinət əşyalarının oğurlandığını müəyyən edərək 5 avqustda polisə müraciət ediblər.

Cütlük, sonuncu dəfə 20 iyulda qızılları yoxladıqlarını, 28 iyula qədər isə səkkiz gün evdə olmadıqlarını bildirərək, oğruluğun bu müddət ərzində baş verdiyini qeyd edib.

Atakum Rayon Polis İdarəsinin əməkdaşları araşdırma nəticəsində oğurluğun, zərərçəkənlərlə eyni binada yaşayan və yaxın qonşuluq münasibətləri olan N.G. (26) adlı qadın tərəfindən törədildiyini müəyyən ediblər. N.G.-nin qonşusunun ev açarını açar ustasında kopyalatdığı, bu yolla evə daxil olaraq qızılları oğurladığı ortaya çıxıb.

Şübhəlinin evində aparılan axtarış zamanı oğurlanan zinət əşyalarının yalnız kiçik bir hissəsi tapılıb. Qalan qızılların isə satılaraq 1 milyon 300 min lirəlik yeni avtomobil alındığı məlum olub. Təqsirini etiraf edən və peşman olduğunu bildirən N.G., Recep Tokur Polis Mərkəzindəki ifadəsinin ardından Samsun Ədliyyəsinə göndərilib.

Qadın qonşusunun açarını gizlicə kopyalayaraq evdəki bütün qızılları oğurladı

Telegramda izləyin