Təyyarədə oturacağını təpikləyən uşağa reaksiya verdi, hücuma məruz qaldı

Çində baş verən şok edici hadisə sosial mediada böyük rezonans doğurub.

Sonxeber.az xarici mediaya istinadən xəbər verir ki, 3 saat 47 dəqiqəlik uçuş boyu arxasındakı oturacağı davamlı olaraq təpikləmiş kiçik bir uşaqdan şikayət edən qadın, təyyarə endikdən sonra uşağın ailəsi tərəfindən hücuma məruz qalıb.

Hadisə 7 avqust tarixində Shenzhen–Dalian marşrutu üzrə hərəkət edən China Southern Airlines şirkətinə məxsus CZ6164 reysində baş verib. Təyyarə Daliana endikdən sonra uşağın ailəsi qadını əhatəyə alaraq ona fiziki təzyiq göstərib. Ailə üzvləri "O, sadəcə uşaqdır, bir az anlayışlı ol" deyərək qadının reaksiyasını haqsız hesab etdiklərini bildirib.

Şahidlərin sözlərinə görə, uşaq uçuş boyunca dəfələrlə oturacağı təpikləmiş və xəbərdarlıqlara baxmayaraq bunu davam etdirib. İddialara əsasən, enişdən əvvəl koridorda gəzərkən qadına bilərəkdən çırpılıb, onun qulaqlığını yerə salıb.

Təyyarə endikdən sonra salon daxilində yaranan gərginlik başqa bir sərnişin tərəfindən görüntülənib. Videoda qadının "Polisi çağırın! Artıq həddi aşırsınız!" deyə qışqırdığı, yerə yıxıldığı və saçının çəkildiyi görünür. Məlumata görə, uşağın atası qadını itələyib, anası isə qışqıraraq təhqirlər səsləndirib, bacısı isə saçını çəkib. Ekipaj müdaxilə etməyə çalışsa da, itişmə zamanı geri itələniblər.

Qadın yerə yıxılmış vəziyyətdə əşyalarına sarılarkən ailənin hücumu davam edib. China Southern Airlines hadisəni təsdiqləyərək ekipajın vəziyyəti nəzarət altına almağa çalışdığını və polis çağırıldığını bildirib. Dalian Zhoushuizi Beynəlxalq Hava Limanı rəsmiləri isə məsələ ilə bağlı araşdırmanın davam etdiyini açıqlayıb.

Qeyd edək ki, son aylarda təyyarələrdə sərnişinlər arasında baş verən oxşar insidentlər artmaqdadır. Bir müddət əvvəl Böyük Britaniya–Ryanair uçuşunda ağlayan körpə səbəbilə sərnişinlər dalaşmış, başqa bir hadisədə isə biznes klas yüksəltmə tələbi rədd edilən qadın uçuş zamanı qışqırıb özünü açıq-saçıq şəkildə nümayiş etdirdiyi üçün təyyarədə bağlanmaq məcburiyyətində qalmışdı.

Telegramda izləyin