Yolu keçmək istəyən şəxs avtomobilin vurması nəticəsində həyatını itirdi

Adıyaman–Gölbaşı avtomobil yolunda baş verən ağır qəza bir nəfərin ölümü ilə nəticələnib.

Sonxeber.az türk mediasına istinadən xəbər verir ki, hadisə, Şanlıurfa Yol Ayrımı Qovşağı yaxınlığında qeydə alınıb. 36 yaşlı İmam Çiçek, 63 FB 915 dövlət nömrə nişanlı avtomobilini yol kənarına park edərək qarşı tərəfdə yerləşən yanacaqdoldurma məntəqəsinə piyada keçmək istəyib.

Bu zaman Adıyaman istiqamətindən Gölbaşı istiqamətinə hərəkət edən 02 AFR 386 nömrəli minik avtomobili İmam Çiçəkə çarpıb. Qəza anı təhlükəsizlik kamerasına anbaan əks olunub. Hadisə zamanı yoldan keçən digər avtomobillər də həm qəza edən maşına, həm də yerdə yatan İmam Çiçəkə dəyməmək üçün çətinliklə dayanıb.

Ağır yaralanan İmam Çiçəkə hadisə yerində tibbi yardım göstərilib və o, şəhər mərkəzində yerləşən özəl xəstəxanaya aparılıb. Lakin həkimlərin bütün müdaxilələrinə baxmayaraq, Çiçək həyatını itirib. Onun cənazəsi Adıyaman Təhsil və Araşdırma Xəstəxanasının morquna yerləşdirilib.

Qəza yerində olan İmam Çiçəkə məxsus avtomobil və hadisəyə qarışan digər maşın jandarma tərəfindən araşdırıldıqdan sonra yoldan götürülüb. Hadisə ilə bağlı istintaq başladılıb.

Telegramda izləyin