17 milyonluq Ferrari ilə test sürüşünə çıxan usta qəzaya düşdü - VİDEO

İstanbulun Böyükçəkməcə rayonunda təxminən 17 milyon türk lirəsi dəyərindəki Ferrari markalı avtomobili test sürüşünə çıxaran usta qəza törədib. Avtomobil sığortalı olmadığından, zərərin qarşılanmasını usta öz üzərinə götürəcəyini bildirib.

Sonxeber.az türk mediasına istinadən xəbər verir ki, hadisə dünən saat 15:30 radələrində E-5 magistralında baş verib. Müştərinin Ferrarisini yoxlamaq üçün test sürüşünə çıxan usta Hakan Yılmaz, yolun sürüşkən olması səbəbindən idarəetməni itirib və avtomobili körpü dirəyinə çırpıb. Nəticədə nəqliyyat vasitəsi istifadəyə yararsız hala düşüb.

Qəza ilə bağlı danışan Hakan Yılmaz bunları deyib:
"Avtomobil bizə alt diffuzorun düşməsi və külək səsi ilə bağlı şikayət əsasında gətirilmişdi. Müştərinin diffuzor montajını tamamladıqdan sonra test sürüşünə çıxmağımız lazım idi. Çünki bu tip avtomobillərdə pəncərə çərçivəsi olmur və külək səsini ancaq hərəkət zamanı eşidib tənzimləmək mümkündür. Sınaq üçün çıxdıq, dönüş zamanı təxminən 80 km sürətlə gedərkən qəfil qaz verdik və yolun sürüşkən olması səbəbindən idarəetməni itirərək körpü dirəyinə çırpıldıq. Avtomobilin kaskosu yoxdur, zərəri biz qarşılayacağıq. Çox şükür ki, canımıza heç nə olmadı".

O, sosial mediada özünə qarşı yazılan mənfi rəylərə də münasibət bildirib:
"Sosial şəbəkələrdə çoxlu yanlış məlumat yayılıb. Test sürüşünə çıxmağımız tamamilə normaldır. Biz yüksək sinif avtomobillərlə işləyirik və müştərilərimizin istəyinə uyğun olaraq testlər aparırıq. Testdən sonra isə təmir mərhələsinə keçiririk".

Telegramda izləyin