Ərini qətlə yetirib cəsədini 9 ay gizlədən qadın həbs edildi

Türkiyədə Konyanın Meram rayon Polis İdarəsinin Cinayətlərin Qarşısının Alınması və İstintaq Şöbəsi əməkdaşları Dere məhəlləsində şübhəli hərəkətləri olan bir qadını saxlayıblar.

Sonxeber.az türk mediasına istinadən xəbər verir ki, qadının təqdim etdiyi başqa adla düzəldilmiş köhnə tipli şəxsiyyət vəsiqəsinin saxta olduğu müəyyənləşdirilib. Barmaq izi yoxlanıldıqdan sonra onun Fatma Sungur olduğu ortaya çıxıb.

Araşdırmalar zamanı məlum olub ki, Fatma Sungur 2007-ci ilin iyun ayında Kırıkkalede həyat yoldaşı Özgür Sunguru evində tapança ilə qətlə yetirib, cəsədini isə qoxunun yayılmaması üçün 9 ay boyunca hamamda vannada, naylona bükülü vəziyyətdə saxlayıb.

Həmin dövrdə "Qəsdən yaxın qohumu öldürmək" ittihamı ilə həbs edilən Fatma Sungurun bir müddət əvvəl Denizli Çardak Açıq Həbsxanasından qaçdığı məlum olub. Onun həmçinin "Məhkum və ya təqsirləndirilən şəxsin qaçması" və "iftira" maddələri üzrə də axtarıldığı, ümumilikdə isə 18 il 8 ay 15 gün müddətinə azadlıqdan məhrumetmə cəzasının olduğu müəyyən edilib.

Fatma Sungur polis tərəfindən saxlanılıb, istintaq prosedurlarından sonra məhkəməyə göndəriləcəyi bildirilib.

Telegramda izləyin