15 yaşlı uşaq dostunu ov tüfəngi ilə vuraraq öldürüb - VİDEO

Kahramanmaraşda iki dost arasında başlayan silahlı oyun faciə ilə nəticələndi. 15 yaşlı E.K., atasına məxsus ov tüfəngi ilə zarafatlaşarkən, təsadüfən 16 yaşlı Batuhan Sivaslıoğlunu başından vuraraq ölümünə səbəb olub.

Sonxeber.az türk mediasına istinadən xəbər verir ki, hadisə axşam saatlarında Dulkadiroğlu rayonunun Cumhuriyet məhəlləsində baş verib. İddialara görə, E.K. evdə atasının tüfəngini dostlarına göstərib. Bu zaman silahla zarafat edərkən tüfəng birdən atəş açıb və saçmalar Batuhan Sivaslıoğlunun başına dəyib.

Silah səsini eşidən qonşular evə qaçaraq gənci qanlar içində tapıblar. Hadisə yerinə çağırılan təcili tibbi yardım qruplarının bütün cəhdlərinə baxmayaraq, Batuhan Sivaslıoğlunun həyatını xilas etmək mümkün olmayıb. Acı xəbəri eşidən ailə üzvləri isə hadisə yerində sinir böhranı keçiriblər.

Batuhan Sivaslıoğlunun meyiti otopsiya üçün Adli Tibb Qurumu morquna aparılıb. Hadisədən sonra evdən qaçan E.K. polis tərəfindən qısa müddətdə saxlanılaraq nəzarətə götürülüb.

Polis hadisə ilə bağlı araşdırmanı davam etdirir.

Telegramda izləyin