30 il əvvəl itkin düşən kişi eyni geyimlə evinə qayıtdı

Romaniyanın Bacau qəsəbəsində 1991-ci ildə sirli şəkildə yoxa çıxan bir kişi 30 il sonra, itkin düşdüyü gündə geyindiyi paltarlarla evinə geri dönüb.

Sonxeber.az türk mediasına istinadən xəbər verir ki, hadisə heyvandarlıqla məşğul olan Vasile Gorgos adlı şəxsin ətrafında baş verib. O, 1991-ci ildə 63 yaşında ikən qəfil itkin düşmüş və ailəsinin bütün müraciətlərinə, illərlə aparılan axtarışlara baxmayaraq tapılmamışdı.

Lakin tam 30 il sonra – 29 avqust 2021-ci ildə – gözlənilməz hadisə yaşanıb. Artıq 93 yaşında olan Gorgos, itkin düşdüyü gündəki geyimləri və o dövrə aid qatar bileti ilə ailəsinin evinin qarşısında birdən-birə görünüb. O, sanki qısa bir səfərdən qayıdırmış kimi sakitcə maşından enib.

Yaşlı adam aradan keçən onilliklərə dair heç nəyi xatırlamır. Onun sözlərinə görə, heç vaxt itkin düşməyib və bu müddət ərzində daim evində olub. Aparılan tibbi müayinələr onun fiziki sağlamlığının yaxşı olduğunu göstərsə də, 1991–2021-ci illər arasına dair xatirələr beynindən silinib.

Gorgos yalnız itkin düşməzdən əvvəlki həyatına aid bəzi əsas detalları – ailəsini, təsərrüfatını və doğum tarixini dəqiq xatırlayır. Lakin həmin 30 ildə harada olduğu hələ də müəmmalı olaraq qalır.

Hadisə Romaniyada böyük səs-küy doğurub. Bəzi mütəxəssislər bunun yaddaş itkisi və ya ağır dissosiativ pozuntu ola biləcəyini irəli sürsələr də, bu sirli dönüşün arxasındakı həqiqət hələ də üzə çıxmayıb.

Telegramda izləyin