Qəzada əzilən 15 milyonluq Ferrari məşhur futbolçuya satıldı

Türkiyənin günlərlə gündəmdə qalan Ferrari qəzası ilə bağlı yeni məlumat yayılıb.

Sonxeber.az türk mediasına istinadən xəbər verir ki, hadisə İstanbulun Böyükçəkmece rayonunda baş verib. Təmir üçün servisdə saxlanılan Ferrari, usta Hakan Yılmaz tərəfindən test sürüşünə çıxarıldığı zaman qəzaya uğrayaraq ağır zədələnib.

Lüks avtomobillərin təmiri ilə məşğul olan Yılmaz, sosial şəbəkədə paylaşım edərək avtomobilin artıq satıldığını bildirib. Onun sözlərinə görə, avtomobili futbolçu Sercan Türk alıb.

Məlumata görə, hazırda 34 yaşı olan Sercan Türkün avtomobillərə böyük marağı var. O, daha əvvəl də zədələnmiş maşınları alaraq təmir etdirib. Ferrari-ni də öz hesabına bərpa etdirməyi planlaşdırır.

Hakan Yılmaz satış qiymətini açıqlamaq istəməsə də, avtomobilin normal bazar dəyərinin təxminən 15 milyon lirə olduğu bilinir. Qəzadan sonra maşının dəyərinin 50 faizdən çox itirdiyi, bu səbəbdən aşağı qiymətə satıldığı qeyd olunub.

Yılmaz açıqlamasında əlavə edib ki, avtomobilin sahibi ilə bütün hesabları bağlayacaq, heç bir zərərçəkən olmayacaq və lüks avtomobil servisi fəaliyyətini davam etdirəcək.

O həmçinin vurğulayıb ki, Ferrari daha əvvəl də qəzaya düşüb, şassi və podvoy hissələrində zədələr olub. Bu səbəbdən son qəza zamanı avtomobil daha ağır zərər alıb.

Telegramda izləyin