Toy mərasimində açılan atəş faciəyə səbəb oldu: 1 ölü, 2 yaralı

Trabzonun Çaykara rayonunda keçirilən toy mərasimində dəhşətli hadisə baş verib.

Sonxeber.az türk mediasına istinadən xəbər verir ki, gəlin alma zamanı evin həyətinə doğru təsadüfi açılan atəş nəticəsində güllələrdən biri qonaqlara dəyib. Nəticədə 1 nəfər həyatını itirib, 2 nəfər yaralanıb.

Məlumata görə, toyda 2 nəfər havaya atəş açıb. Səpələnən güllələr nəticəsində F.H. (43), B.S.T. (16) və Z.S. (31) yaralanıb. Ağır xəsarət alan F.H. xəstəxanaya çatdırılsa da, həkimlərin müdaxiləsinə baxmayaraq həyatını xilas etmək mümkün olmayıb. Digər iki yaralının müalicəsi davam edir.

Hadisə ilə bağlı gəlinin qohumu olan polis əməkdaşı və onun yaxın qohumu jandarma tərəfindən saxlanılıb.

Hadisədən sonra toy evində və məhəllədə dərin sükut çöküb. Sual doğuran məqam isə gəlin maşınının üzərində yazılan "anamın ilk gəlinidir, atamın ilk qızıdır" və "qardaşım evlənir, növbə mənə gəlir" cümlələri olub.

Baş verənlərlə bağlı araşdırma aparılır.

Telegramda izləyin