"Azərbaycan, Özbəkistan və Türkmənistan əlaqələri ortaq tarixi köklərə, dini dəyərlərə və mədəni irsə dayanır" - DEPUTAT

"Cənab Prezident İlham Əliyevin Türkmənistana rəsmi səfəri, səfər çərçivəsində Azərbaycan, Özbəkistan və Türkmənistan liderləri arasında yüksəksəviyyəli görüşün keçirilməsi dövlətlərarası münasibətlərimizin kəmiyyət və keyfiyyət göstəriciləri baxımından yeni müstəviyə yüksəlməsinin göstəricidir. Avazda səsləndirilən fikirlər və birgə bəyanat üçtərəfli əlaqələrin gələcək konturlarının dəqiq xəritəsi idi" - bunu Sonxeber.az -a açıqlama verən deputat Günay Ağamalı deyib:

"Azərbaycan, Özbəkistan və Türkmənistan əlaqələri ortaq tarixi köklərə, dini dəyərlərə və mədəni irsə dayanır. Rəsmi Aşqabad və Daşkənd 44 günlük Vətən Müharibəsindən sonra işğaldan azad olunmuş ərazilərin bərpasında öz dəstəyini nümayiş etdirir. Bütün bunlar məhz qardaşlıq bağlarımızın təcəssümüdür. Möhtərəm cənab Prezident İlham Əliyev çıxış zamanı göstərilən doğma münasibəti xüsusi olaraq vurğuladı və bu addımları xalqımızın yüksək qiymətləndirdiyini diqqətə çatdırdı.

Bilindiyi kimi qlobal ticarət və nəqliyyat maşurtlarında köklü dəyişikliklər baş verir və Cənubi Qafqaz- Orta Asiya xətti müsbət kontekstdə yeni geoiqtisadi çağırışlarla qarşı-qarşıyadır. Azərbaycan unikal və strateji əhəmiyyətli mövqeyi ilə yeni tranzit paradiqmaları formalaşdırır. Xüsusilə, avqustun 8-də Zəngəzur dəhlizi ilə bağlı taleyüklü razılaşmanın əldə olunması ölkələrimiz üçün əvəzsiz fürsətlər yaradır və Türkmənistanla Özbəkistanın Avropa bazarlarına çıxışını asanlaşdırır. Bu mənada ölkə başçısı Cənab İlham Əliyevin bəyanatdakı vurğuları logistika arxitekturasının mərkəzində Azərbaycanın dayandığını bir daha nümayiş etdirdi. Məhz dövlət başçımızın liderliyi və uzaqgörənliyi sayəsində ölkəmiz nəqliyyat, enerji, sənaye kimi sahələrdə üçtərəfli tərəfdaşlığı təmin edən aprıcı qüvvəyə çevrilib.

Cənab Prezidentində qeyd etdiyi kimi, ölkələrimiz ikitərəfli müstəvidə uğurlu əməkdaşlıq mühiti formalaşdırmağı bacarıb və eyni rasional yanaşma ilə üçtərəfli tərəfdaşlıq modelini inkişaf etdirmək üçün geniş perspektivlər mövcuddur.
Liderlərin görüşündə əsasən limanların böyüdülməsi, nəqliyyat yollarının davamlı işləməsi, Türkmənbaşı ilə Bakı limanlarını və Ələt azad iqtisadi zonasını birləşdirən xəttin inkişafı, həmçinin Orta Dəhlizə qoşulmanın uyğunlaşdırılması müzakirə olunub. Nəticə etibarilə, cənab Prezident İlham Əliyevin Türkmənistana rəsmi səfəri və üçtərəfli formatın təşkili özünün məhsuldarlığı ilə uzun müddət ölkələrimizin tərəqqisinə stimul olacaq".

Telegramda izləyin