Bir anda kor oldu, səbəbini 3 il heç kəs tapa bilmədi - VİDEO

Ankarada yaşayan 51 yaşlı, iki uşaq anası Mevlüde Yıldızelinin həyat keyfiyyəti son 3 ildə kəskin şəkildə pisləşib. Görmə itkisi, güclü baş ağrısı, qulaqda səs-küy, yaddaş problemləri və tarazlıq pozğunluğu səbəbilə dəfələrlə xəstəxanaya müraciət edən Yıldızeliyə diaqnoz qoyulmayıb.

Sonxeber.az türk mediasına istinadən xəbər verir ki, Ankara Bilkent Şəhər Xəstəxanasında aparılan ətraflı müayinələr nəticəsində onun beynində toplardamar tıxanıqlığı olduğu aşkarlanıb. Xəstəxananın Beyin Cərrahiyyəsi uzmanı Prof. Dr. Ergün Dağlıoğlu tərəfindən qasıq damarlarından daxil olunaraq aparılan minimal invaziv əməliyyatla damarları açılan Yıldızeli sağlamlığına qovuşub.

Prof. Dr. Dağlıoğlu, xəstənin şiddətli baş ağrısı, qulaqlarda çınlama və yeriyərkən yıxılma şikayətləri ilə müraciət etdiyini bildirib:

"Edilən tetkiklər normal görünürdü, lakin biz beynin toplardamarlarında tıxanıqlıqdan şübhələndik. Anjiyografik müayinə nəticəsində darlıq təsdiqləndi və müdaxilə qərarı verdik. Minimal invaziv üsulla toplardamarlara daxil olub stent və balon tətbiqi ilə tıxanıqları aradan qaldırdıq. Bu cür əməliyyatlar yüksək risk daşımır və nəticə çox tez əldə olunur. Xəstəmiz əməliyyatdan dərhal sonra qulağındakı səslərin yox olduğunu söylədi" – deyə o vurğulayıb.

Mevlüde Yıldızeli isə 2022-ci ildən bəri həyatının kabusa çevrildiyini bildirib:

"Bir çox xəstəxanaya getdim, infeksiya dedilər, müalicə aldım, amma faydası olmadı. Təkbaşına bir yerə gedə bilmirdim, tez-tez yıxılırdım. Dərhal anjiyo təklif etdilər və qəbul etdim. Əməliyyatdan sonra damarlarım açıldı, özümə gələndə elə bil yenidən doğuldum. Hazırda çox rahat və xoşbəxtəm" – deyə o danışıb.

Telegramda izləyin