Ailəsi ilə mübahisə edən kişi özünü otağa kilidlədi: xüsusi təyinatlı polis zorla çıxartdı

Eskişehirin Tepebaşı rayonuna bağlı Sazova məhəlləsində yerləşən iki mərtəbəli evdə gərginlik yaşanıb.

Sonxeber.az türk mediasına istinadən xəbər verir ki, evdə yaşayan S.Ö. adlı şəxs naməlum səbəbdən ailəsi ilə mübahisə edərək özünü bir otağa kilidləyib.

Onun özünə zərər yetirməsindən ehtiyatlanan yaxınları vəziyyəti 112 Təcili Çağrı Mərkəzinə xəbər veriblər. Əraziyə polis və təcili tibbi yardım əməkdaşları cəlb olunub. Saatlarla aparılan danışıqlara baxmayaraq, S.Ö. otaqdan çıxmağa razı olmayıb.

Hadisə yerinə sonradan xilasedicilər və xüsusi təyinatlı polis çağırılıb. Xüsusi təyinatlıların da çağırışlarına məhəl qoymayan S.Ö. sonda polis tərəfindən zorla otaqdan çıxarılaraq təcili yardıma təhvil verilib. Hadisəni qonşular həyəcanla izləyiblər.

Təcili tibbi yardıma mindirilən S.Ö. anasına səslənərək, "Mənim bir şeyim yoxdur, niyə polisi çağırırsınız? Mən sizə nə etdim ki?" deyib. Zaman-zaman əsəbiləşərək səsini qaldıran şəxs polis tərəfindən sakitləşdirilib.

Başında yüngül qanama olan S.Ö.-yə ambulansta ilkin tibbi yardım göstərildikdən sonra o, Eskişehir Osmangazi Universiteti Tibb Fakültəsi Xəstəxanasına aparılıb.

Telegramda izləyin