Siçan dişləyən uşağa quduzluq iynəsi olundu - VİDEO

Ankara şəhərinin Sincan rayonunda evində yatarkən bir uşağı lağım siçanı dişləyib.

Sonxeber.az türk mediasına istinadən xəbər verir ki, hadisədən sonra uşağa quduzluq əleyhinə peyvənd vurulub və tibbi müalicəyə başlanılıb. Anası isə hadisəyə etiraz edərək aidiyyəti qurumlardan dərhal dərmanlama işlərinin aparılmasını tələb edib.

Hadisə Fevzi Çakmak qəsəbəsində baş verib. Uşağın anası Hasrət Ermiş bildirib ki, səhər saatlarında oğlunun ağlama səsi ilə oyandıqlarında, onun üzündən qan axdığını görüblər:
"Qan dayanmırdı. Ərim uşağı sakitləşdirməyə çalışarkən, mən çarşafları dəyişmək üçün otağa qayıtdım və həmin vaxt lağım siçanını gördüm. Yatağın altından çıxaraq radiatorun altına girdi. Mənim qışqırığımdan sonra qaçdı. Daha sonra otaqların qapılarını bağladım. Çünki uşağım epilepsiya xəstəsidir və belə bir dişləmənin fəsadından qorxdum. Tez Bilkənd Şəhər Xəstəxanasına getdik".

Xəstəxanada uşağın üzündə açıq yaralar olduğu üçün infeksiya riski nəzərə alınaraq xüsusi dərman vurulub. Həmçinin quduzluq əleyhinə peyvəndin ilk dozası edilib, növbəti 4 dozanın da vurulacağı bildirilib. Uşağa antibiotik müalicəsi də təyin olunub.

Ermiş, evin banyosunda və balkonda açıq kanalizasiya xətlərinin olduğunu, siçanın da həmin yerlərdən evə girdiyini düşündüklərini bildirib. O, hadisədən sonra bələdiyyə ilə əlaqə saxladığını, lakin 3 gün keçməsinə baxmayaraq hələ də dərmanlama aparılmadığını deyib:
"Biz bunu övladımızla yaşadıq, amma başqaları yaşamasın. Çünki bu heyvanlar xəstəlik daşıyır. Gərəkli dərmanlama və tədbirlər bir an öncə görülsün".

Telegramda izləyin