Marşrut sürücüsü güllə yaralarına baxmayaraq 600 metr məsafəni sürdü

Adanada silahlı hücuma məruz qalan marşrut sürücüsü güllə yaralarına baxmayaraq 600 metr məsafəni idarə edə bilib.

Sonxeber.az türk mediasına istinadən xəbər verir ki, hadisə Seyhan rayonunun Dağlıoğlu məhəlləsində baş verib. Məlumata görə, sərnişinlərini düşürdükdən sonra evinə getmək üçün yola çıxan 47 yaşlı marşrut sürücüsü Orhan Gündüz naməlum şəxs və ya şəxslər tərəfindən atəşə tutulub.

Belindən və ayaqlarından yaralanan Gündüz təxminən 600 metr məsafəni idarə etməyə davam edib. Lakin bir müddət sonra huşunu itirərək idarəetməni itirib və marşrut avtomobili elektrik dirəyinə çırpılaraq dayanıb.

Hadisə yerinə polis və təcili tibbi yardım briqadası cəlb olunub. Ağır yaralı vəziyyətdə xəstəxanaya çatdırılan Gündüz həkimlərin bütün müdaxilələrinə baxmayaraq xilas edilə bilməyib. Onun meyiti otopsi üçün Adana Məhkəmə-Tibbi Ekspertiza İdarəsinin morquna göndərilib.

Polis, silahlı hücumu törədən şübhəli və ya şübhəlilərin tutulması üçün əməliyyat-axtarış tədbirlərinə başlayıb.

Telegramda izləyin