Market işçiləri pomidor qutularını niyə zibil qablarına atıb? - VIDEO

İstanbulun Ataşəhər rayonunda yerləşən bir supermarketdə qutularla pomidorun zibilə atılması görüntüləri sosial şəbəkələrdə müzakirələrə səbəb olub.

Sonxeber.az türk mediasına istinadən xəbər verir ki, Yenisahra məhəlləsindəki mağazanın işçiləri çoxlu miqdarda pomidoru ard-arda zibil qutularına boşaldıb. Həmin anlar bir vətəndaşın mobil telefonu ilə lentə alınıb. Görüntülərdə ərazidə olan bir şəxsin zibilə atılan pomidorları götürməyə çalışdığı da əks olunub.

Sosial şəbəkələrdə yayılan görüntülərin ardından Ticarət Nazirliyinə bağlı İstanbul Ticarət İl Müdürlüğü əməkdaşları mağazada yoxlama həyata keçirib. Yoxlamanın nəticəsində pomidorların satış xüsusiyyətini itirdiyi üçün məhv edildiyi məlum olub.

Nazirlikdən verilən açıqlamada bildirilib:

"İstanbul Ticarət İl Müdürlüğü qruplarımız tərəfindən 26.08.2025 tarixində Ataşəhərdə fəaliyyət göstərən sözügedən marketdə aparılan yoxlamada müəyyən edilib ki, görüntülərdə yer alan məhsullar satışda olan ‘Sousluq, salçalıq pomidor’ məhsuludur. Şirkət qeydlərinin araşdırılması zamanı 22.08.2025 – 26.08.2025 tarixləri arasında ümumilikdə 20 min 897 kq pomidorun mağazaya daxil olduğu, onlardan 1 min 700 kq-lıq hissəsinin satış keyfiyyətini itirdiyi üçün şirkət tərəfindən məhv edildiyi müəyyən edilib. İmha prosesinə dair akt və qaimələr yoxlama qrupumuza təqdim olunub. Ticarət Nazirliyi olaraq istehlakçı hüquqlarının qorunması və qida təhlükəsizliyinin təmin edilməsi məqsədilə yoxlamaları fasiləsiz davam etdirəcəyimizi, hər hansı qanunsuz və ədalətsiz ticarət fəaliyyətinə yol verilməyəcəyini ictimaiyyətin diqqətinə çatdırırıq"

Telegramda izləyin