16 yaşlı qız avtomobildə silahla vurulmuş halda ölü tapıldı

Mersinin Toroslar rayonunda dəhşətli hadisə baş verib.

Sonxeber.az türk mediasına istinadən xəbər verir ki, 16 yaşlı Hiranur Nilgün Aygar park halında olan avtomobilin içində odlu silahla vurularaq həyatını itirib. Hadisə ilə bağlı üç nəfər saxlanılıb.

Məlumata görə, Akbelen məhəlləsində park edilmiş avtomobilin içində gənc qızın silahla vurulduğu barədə polisə və təcili yardıma xəbər daxil olub. Hadisə yerinə çatan həkimlər Hiranur Nilgün Aygarın artıq dünyasını dəyişdiyini təsdiqləyiblər.

Mersin Respublika Prokurorluğu tərəfindən başlanılan istintaq çərçivəsində hadisə zamanı avtomobildə olan Arda Ş. (19), N.Ç. (20) və M.Z. (28) saxlanılıb. Arda Ş. ilkin ifadəsində Aygarın əlindəki silahı göstərərkən təsadüfən atəş aldığını iddia edib.

Lakin o, sonrakı ifadəsində silahı boş zənn edərək zarafatla qızın alnına dayadığını və tətiyə basdığını etiraf edib. Şübhəli, hadisədən sonra qızı dərhal xəstəxanaya aparmadıqlarını, əvvəlcə Yenişəhər rayonunda Müftü Deresi yaxınlığında bir yerə qoyduqlarını bildirib. Polis həmin ərazidə qan izləri aşkarlayıb.

Aygarın meyiti aparılan məhkəmə-tibbi ekspertizadan sonra ailəsinə təhvil verilib və Güneykent qəbiristanlığında göz yaşları içində dəfn olunub.

Hadisə ilə bağlı istintaq davam edir.

Telegramda izləyin