6 yaşlı qız uşağı doğulduqdan bəri otaqda kilidli saxlanılıb

Braziliyanın Sorocaba şəhərində insanlıqdan kənar bir hadisə baş verib.

Sonxeber.az xarici mediaya istinadən xəbər verir ki, polisə edilən şikayət əsasında aparılan əməliyyat zamanı illərlə evdə kilidli saxlanılan 6 yaşlı qız uşağı xilas edilib.

Məlumata görə, azyaşlı doğulduqdan bir neçə ay sonra ailəsi tərəfindən cəmiyyətdən tamamilə təcrid olunub. Ata, onun digər ailə üzvləri ilə ünsiyyət qurmasına icazə verməyib və sosial həyata qatılmasını qadağan edib.

Qızın indiyədək heç vaxt məktəbə getmədiyi, tibbi müayinə və peyvəndlərdən kənarda qaldığı, danışmağı öyrənə bilmədiyi müəyyənləşib. O, yalnız şpris vasitəsilə verilən maye qidalarla bəslənib. Mütəxəssislər uşağın yalnız bəzi səslər çıxara bildiyini, danışıq qabiliyyətinin inkişaf etmədiyini bildiriblər.

Uşaq müdafiə mütəxəssisi Lígia Guerra açıqlamasında, qız otaqdan çıxarıldığı an ilk dəfə xarici dünyanı görürmüş kimi davrandığını və böyük təəccüb yaşadığını deyib. Baxımsızlıq səbəbindən saçlarının tam dolaşdığı və kəsilmək məcburiyyətində qaldığı da qeyd olunub.

Polis 54 yaşlı atanı və 45 yaşlı ananı saxlayıb, evdəki üç mobil telefona da əl qoyub. Kiçik qız dövlət himayəsinə götürülərək sığınacağa yerləşdirilib. Hazırda onun həm psixoloji, həm də fiziki müalicəsi davam etdirilir.

Braziliya ictimaiyyətində böyük rezonans doğuran hadisə ilə bağlı valideynlərə "azadlığı məhdudlaşdırma" və "uşağa qarşı laqeydlik" kimi ağır ittihamlar irəli sürülüb. Məhkəmənin qərarı ilə ata və ana həbs edilib.

Telegramda izləyin