Küçədə kütləvi dava: Polisə bıçaq və stul ilə hücum edildi

Aksarayda iki qrup arasında başlayan mübahisə kütləvi davaya çevrilib.

Sonxeber.az türk mediasına istinadən xəbər verir ki, hadisə zamanı polis əməkdaşlarına bıçaq və stul ilə hücum edilib, nəticədə 2-si polis olmaqla 4 nəfər yaralanıb. Hadisə anı kameralara da əks olunub.

Hadisə şəhərin Muhsin Çələbi məhəlləsində, 600-cü küçədə qeydə alınıb. Məlumata görə, 23 yaşlı Mustafa A. və atası 46 yaşlı Ali A. əvvəlcədən ədavətləri olan 48 yaşlı Tuncer Ç. və 22 yaşlı oğlu Mustafa Samet Ç. ilə söz davasına çıxıb. Qısa müddətdə böyüyən mübahisə kütləvi davaya çevrilib.

Əraziyə polis və təcili tibbi yardım əməkdaşları cəlb olunub. Lakin tərəfləri ayırmaq istəyən polis əməkdaşlarına qarşı Mustafa A. əlindəki stulu ataraq bir polisi yaralayıb. Atası Ali A. isə əlindəki bıçaqla həm vətəndaşlara, həm də polis əməkdaşlarına hücum edib. Polisin xəbərdarlığına baxmayaraq, Ali A. bıçağı yerə qoymayaraq müqavimət göstərib və bıçağı polisə atıb. Oğlu Mustafa A. isə atasını qorumaq adı ilə polisləri təhdid edib və yumruq-təpiklə hücum edib.

Polis əməkdaşları və bekçilər bibər qazından istifadə edərək hücum edən ata-oğulu nəzarətə alıblar. Yaralanan 2 polis əməkdaşına yerində ilkin tibbi yardım göstərilib, daha sonra xəstəxanaya aparılıblar. Polis əməkdaşlarından birinin qolunun sınıb alçıya alındığı bildirilib.

Hadisə ilə əlaqədar Mustafa A., atası Ali A., qarşı tərəfdən isə Mustafa Samet Ç. (22), Y.Ç. (16), M.A.K. (17), B.Ş. (17) və Tuncer Ç. (48) olmaqla ümumilikdə 7 nəfər saxlanılıb. Faktla bağlı Aksaray Cumhuriyyət Baş Prokurorluğu tərəfindən araşdırma başlanılıb.

Telegramda izləyin