ChatGPT-yə güvənən kişi gecikmiş xərçəng diaqnozu ilə üzləşdi

İrlandiyanın Kerry bölgəsində yaşayan, iki uşaq atası 37 yaşlı Warren Tierney aylardır boğaz ağrısı və udqunma çətinliyi yaşamasına baxmayaraq, həkimə getmək əvəzinə süni intellektə müraciət edib. ChatGPT-yə verdiyi suallara aldığı cavab onun həyatını dəyişib.

Sonxeber.az xarici mediaya istinadən xəbər verir ki, süni intellekt Tierneynin simptomlarını ciddi qəbul etməyib və xərçəng riskinin "çox aşağı" olduğunu bildirib. Bu sözlərə güvənən Tierney həkimə getməyi təxirə salıb. Lakin ağrıları dözülməz hala gələndə xəstəxanaya müraciət edib və şok xəbər alıb. Ona gecikmiş qida borusu xərçəngi diaqnozu qoyulub.

Xəstəlik artıq irəlilədiyi üçün onun təxminən 5 il yaşama şansı qaldığı bildirilib. Mütəxəssislər qeyd edirlər ki, belə hallarda erkən diaqnoz qoyulmadıqda müalicə nəticələri son dərəcə məhduddur.

Tierney yaşadıqlarını belə izah edib: "ChatGPT-yə güvənmək məni ehtimal ki, beş ay gecikdirdi. Bu texnologiya insanın eşitmək istədiyini deyir, amma həqiqəti deyil".

Hadisədən sonra OpenAI xəbərdarlıq edib ki, süni intellekt sistemləri tibbi diaqnoz və müalicə məqsədilə istifadə edilməməlidir.

Telegramda izləyin