Su quyusuna görə başlayan dava qanla bitdi

Şanlıurfanın Birecik rayonuna bağlı Çiçəkalan kəndində Müslüm Y. ilə əmisi uşaqları arasında sondaj yolu ilə açılan su quyusu üstündə mübahisə yaranıb.

Sonxeber.az türk mediasına istinadən xəbər verir ki, mübahisə böyüdükdən sonra əmisi uşaqları Müslüm Y.-nin evinin qarşısına gələrək ona hücum ediblər. Başına daş zərbəsi alan Müslüm Y. huşunu itirərək yerə yıxılıb.

Hadisənin görüntülərinə əsasən, şəxslərin yerə yıxılan və hərəkətsiz qalan Müslüm Y.-ni döyməyə davam etdiyi, dəfələrlə başına daşla zərbə vuraraq əzməyə çalışdıqları müşahidə olunub.

Baş verənləri görən həyat yoldaşı da daş ataraq hücuma cavab verib. Ərini xilas etməyə çalışan qadın da döyülərək xəsarət alıb. Əraziyə toplaşan kənd sakinləri yaralı vəziyyətdə yerdə qalan Müslüm Y.-ni hücum edənlərin əlindən xilas ediblər. Yaralılar xəstəxanaya çatdırılıb. Müslüm Y.-nin üzündəki sümüklərin qırıldığı, gözündə isə görmə itkisi yarandığı, həyat yoldaşının vəziyyətinin isə yaxşı olduğu bildirilib.

Hadisə yerinə gələn jandarma əməkdaşları davada iştirak edənləri müəyyənləşdirmək üçün araşdırmalara başlayıb. Faktla bağlı istintaq davam edir.

Telegramda izləyin