Market 8 manatlıq yağı 23 manata satdı - Nazirlik araşdırma başlatdı - VİDEO

Türkiyədə sosial şəbəkələrdə yayılan bir video böyük müzakirələrə səbəb olub.

Sonxeber.az türk mediasına istinadən xəbər verir ki, görüntülərdə bir market sahibinin 150 lirəyə (təxminən 8 manat) olan günəbaxan yağını 450 lirəyə (təxminən 23 manat) satdığı iddia edilib. Görüntülərdən sonra market tərəfindən bunun "zarafat məqsədli" edildiyi bildirilsə də, Ticarət Nazirliyi həm araşdırma aparmağa, həm də məsələni prokurorluğa çatdırmağa qərar verib.

Məlumata görə, video 20 sentyabrda sosial şəbəkələrdə yayılıb. Nazirliyin diqqətini çəkən görüntülərdə market əməkdaşı 150 lirəlik yağı 450 lirəyə satdıqlarını deyib. Araşdırma zamanı həmin marketin "T. Market" olduğu müəyyən edilib. Yağın istehsalçısı isə açıqlama verərək 151,50 lirəlik maya dəyərinin 2023-cü ilə aid olduğunu, hazırkı bazar qiymətləri ilə əlaqəsi olmadığını bildirib.

Ticarət nazirinin müavini Mahmut Gürcan, Hatay Ticarət İl Müdirliyi əməkdaşlarının araşdırmaları nəticəsində görüntülərdəki şəxsin Abdullah G. olduğunu açıqlayıb. Market sahibi ifadəsində "Sosial mediada zarafat məqsədli paylaşım etdim. Məhsulun alış qiyməti 351,25 lirədir. Hazırda anbarda 55 ədəd mövcuddur" deyib. Bu ifadə rəsmi sənədə də yazılıb.

Nazir müavini bildirib ki, məsələ ilə bağlı 1 milyon 400 min lirədən 17 milyon 200 min lirəyədək cərimə tətbiq oluna bilər. Eyni zamanda, sözügedən videonu araşdırmadan paylaşan 4 sosial media hesabına da 850 min – 8,5 milyon lirə arası cərimə kəsilməsi gündəmdədir. Həmin hesablar barədə də prokurorluğa müraciət olunub.

Gürcan əlavə edib:
"Nazirliyimiz vətəndaşları aldatmağa və yanlış təsəvvür yaratmağa yönəlmiş hər cür addıma qarşı qətiyyətlə mübarizə aparacaq. İctimai maraqların qorunması üçün bütün imkanlarımız səfərbər olunacaq."

Böyük səs-küy yaradan videonun sahibi isə sonradan açıqlama edərək, görüntülərin tamamilə zarafat məqsədilə çəkildiyini bildirib və "Heç kəsi yanıltmaq istəmirdim. Xalqımızdan və böyüklərimdən üzr istəyirəm" sözlərini deyib.

Telegramda izləyin