"II Azərbaycan-Özbəkistan Media Forumunun Bakıda keçirilməsi, iki qardaş xalqın strateji yaxınlığının bariz göstəricisidir" - AÇIQLAMA

Bu gün Bakıda başlayan II Azərbaycan-Özbəkistan Media Forumu qardaş xalqlar arasında dostluq və əməkdaşlığın gələcək inkişafına yönəlib.

Bu barədə Özbəkistan XİN-in mətbuat katibi Ahror Burhanov "X" sosial şəbəkəsində yazıb.

O, Özbəkistan və Azərbaycan arasında müttəfiqlik münasibətlərinin media sahəsində də möhkəmləndiyini vurğulayıb.

"Bu nüfuzlu tədbir Özbəkistan Prezidenti Şavkat Mirziyoyevin 2023-cü ilin avqustunda Azərbaycana dövlət səfəri zamanı imzalanmış Yol Xəritəsi çərçivəsində təşkil edilib", - mətbuat katibi qeyd edib.

"II Azərbaycan-Özbəkistan Media Forumunun Bakıda keçirilməsi təsadüfi deyil, bu proses iki qardaş xalqın strateji yaxınlığının bariz göstəricisidir", - bunu Sonxeber.az -a açıqlama verən politoloq Tural İsmayılov deyib:

"Azərbaycan və Özbəkistan tarixən ortaq mədəniyyət, dil və ənənələrə malikdir, bu amil isə əməkdaşlığı təbii müstəviyə çıxarır. Forumun keçirilməsi medianın yalnız informasiya vasitəsi olmadığını, həm də strateji diplomatiyanın mühüm aləti olduğunu nümayiş etdirir. Özbəkistan XİN-in mətbuat katibinin vurğuladığı kimi, Mirziyoyevin Bakıya səfəri ilə müəyyənləşən Yol Xəritəsi artıq real nəticələr doğurmağa başlayıb. Bu Yol Xəritəsi sadəcə siyasi sənəd deyil, həm də gələcək regional inteqrasiyanın konturlarını müəyyənləşdirən strateji plan kimi dəyərləndirilə bilər. Azərbaycan mediası üçün bu əməkdaşlıq yeni informasiya imkanları açır, Özbəkistan mediası üçün isə Qafqaz regionuna çıxış imkanlarını genişləndirir. Eyni zamanda forum, dezinformasiya və informasiya müharibələrinin artdığı bir dövrdə iki ölkənin media təhlükəsizliyi baxımından da vacibdir. Bu əməkdaşlıq yalnız dövlət mediası ilə məhdudlaşmır, özəl media orqanlarının da yaxınlaşmasına şərait yaradır. Azərbaycan və Özbəkistan regional sabitliyin əsas dayaqlarından sayılır və bu, informasiya mübadiləsini daha strateji edir. Media forumu həm də türk dünyasının informasiya məkanında inteqrasiyanın nümunəsi kimi dəyərləndirilə bilər. Çünki türk dövlətləri arasında mədəni və siyasi əməkdaşlıq üçün informasiya körpüləri böyük rol oynayır. Bu tədbir, həm də Türk Dövlətləri Təşkilatının ümumi informasiya siyasətinə töhfə verir. Bakıda keçirilən forum, gələcəkdə birgə layihələrin, film və veriliş istehsalının da əsasını qoya bilər. Azərbaycan-Özbəkistan münasibətlərində enerji və iqtisadi əməkdaşlıqla yanaşı informasiya mübadiləsi də aparıcı xəttə çevrilir. Forum eyni zamanda iki ölkə arasında ictimai rəyin formalaşmasına da ciddi təsir göstərəcək. Bu, xalqların bir-birini daha yaxından tanıması üçün də imkan yaradır. Belə tədbirlər siyasi yaxınlığı sosial təmələ oturdur. Nəticə etibarilə, Azərbaycan və Özbəkistan mediasının birgə fəaliyyəti regionda yeni informasiya nizamının formalaşmasına xidmət edəcək".

Telegramda izləyin