Dostluq faciə ilə bitdi: Mübahisə zamanı ov tüfəngi işə düşdü

Edirnənin Enez rayonunda dəhşətli hadisə baş verib.

Sonxeber.az türk mediasına istinadən xəbər verir ki, İ.U. adlı şəxs dostları Necati Sunar və Erman Korkmaz ilə aralarında yaranan mübahisə zamanı onları ov tüfəngi ilə güllələyərək öldürüb.

Hadisə saat 18:30 radələrində rayonun Hasköy kəndində qeydə alınıb. Məlumata görə, İ.U. kənd meydanında yerləşən bir dükanın önündə dostları ilə söhbət edərkən mübahisə başlayıb. Mübahisə gərginləşdikdən sonra İ.U. motosikletinin arxasında olan ov tüfəngini götürüb.

Necati Sunar silahı almaq və vəziyyəti sakitləşdirmək istəyərkən tüfəngdən açılan atəşlə vurularaq dünyasını dəyişib. Daha sonra İ.U., Erman Korkmaza da atəş açaraq onu öldürüb.

Ətrafdakıların məlumatı əsasında hadisə yerinə jandarma və təcili tibbi yardım əməkdaşları cəlb olunub. Həkimlərin yoxlaması nəticəsində hər iki şəxsin həyatını itirdiyi təsdiqlənib. İ.U. isə jandarma tərəfindən saxlanılıb.

Meyitlər Edirne Ədli Tibb Qurumu­na aparılıb. Faktla bağlı araşdırma davam etdirilir.

Telegramda izləyin