"Azərbaycanın çoxəsrlik dövlətçilik tarixinin ən parlaq səhifələrindən biri Ulu Öndər Heydər Əliyevin adı ilə bağlıdır" - AÇIQLAMA

"Azərbaycanın çoxəsrlik dövlətçilik tarixinin ən parlaq səhifələrindən biri Ulu Öndər Heydər Əliyevin adı ilə bağlıdır", - bunu Sonxeber.az -a açıqlama verən deputat Günay Ağamalı deyib:

"Onun dövlətçilik fəlsəfəsi, uzaqgörənliyi və sarsılmaz iradəsi sayəsində xalqımız azadlıq, istiqlal, müstəqillik yolunda möhkəm addımlar artmış, milli birliyin və tərəqqinin bünövrəsi qoyulmuşdur.

1991-1993-cü illərdə hadisələri düzgün qiymətləndirə bilməyən həmin dövrün iqtidarı xalq qarşısında gündən-günə nüfuzunu itirir, baş vermiş proseslərdən düzgün nəticə çıxara bilmirdi. Belə bir vəziyyətdən çıxış yolunu axtaran Azərbaycanın xalqı xilasını yalnız Heydər Əliyevin simasında görürdü. Dövlətçilik anlayışından bixəbər olan və hərbi birləşmələri əslində öz məqsədləri üçün istifadə edən ayrı-ayrı şəxslərin hədələrindən qorxub gizlənmiş və bu təhlükəli proseslərin qarşısını ala bilmədiyini dərk edən AXC-Müsavat iqtidarının özü də xilas üçün sonda Heydər Əliyevdən imdad istədi.
Azərbaycan xalqı qanı və canı bahasına əldə etdiyi müstəqilliyin qorunması üçün bu müstəqilliyin əldə olunmasına ən çox töhfə vermiş və onu qoruya biləcək əvəzsiz lideri Heydər Əliyevi dəvət etdi. 1992-ci ilin oktyabrında Azərbaycanın "91-lər" adlanan ziyalılar Heydər Əliyevə hakimiyyətə qayıdışı üçün müraciət etdi. 1993-cü il iyunun 9-da Heydər Əliyev, nəhayət, xalqın və respublikanın hakim dairələrinin təkidli dəvətini qəbul edib Bakıya gəldi.

Xilaskarlıq missiyasını öz üzərinə götürən Ulu Öndər Heydər Əliyev Bakıda hakimiyyət davasının getdiyi bir vaxtda həyatını təhlükə altında qoyaraq dərhal Gəncəyə yollandı və bölgədə davam edən qiyamın qarşısını aldı.

Təbii ki, bu dövrdə baş verən hərbi-siyasi proseslər özünün ən mənfi təsirlərini Qarabağda hiss elətdirirdi. AXC - Müsavat cütlüyünün səriştəsizliyi Ermənistanın Qarabağı işğal prosesini genişləndirməyə şərait yaratmışdı. Mövcud vəziyyətin gərginliyi və risklərini düzgün qiymətləndirən Ulu Öndər adekvat və çevik qərarlarla ilk növbədə nizami ordu quruculuğunun əsasını qoydu və işğalçılara qarşı vahid iradə nümayiş etdirildi. 1993 - cü il 3 oktyabr tarixində keçirilən prezident seçkilərində Ümummilli Lider Heydər Əliyev xalqın mütləq əksəriyyətinin səsini qazanaraq Azərbaycan Respublikasının Prezidenti seçildi. 1993-cü il oktyabrın 10-da dövlətə və xalqa sədaqət andı içən dahi rəhbər Azərbaycanı böyük bəlalardan, faciələrdən hifz edib, ölkəni sabitlik, iqtisadi inkişaf və tərəqqi yoluna çıxarıb, qlobal enerji-kommunikasiya layihələrini reallaşdırmaqla Vətənə sədaqətlə xidmətin əyani nümunəsini sərgilədi.
Ümumilli Lider Heydər Əliyev Azərbaycan xalqının taleyinə yön verən tarixi şəxsiyyət olaraq adını böyük hərflərlə hər bir azərbaycanlının yaddaşına həkk etdirdi. Onun rəhbərliyi altında Azərbaycan dünya birliyində öz layiqli mövqeyinə yüksəldi və dövlət müstəqilliyimiz əbədi, dönməz xarakter aldı.

O, öz fəaliyyəti ilə sübut etdi ki, dövlətin gücü xalqın birliyində, liderin qətiyyətində və milli birliyin möhkəmliyindədir".

Telegramda izləyin