10 gün əvvəl həbsxanadan çıxan qadın dostunun evində ölü tapıldı

Antalyada 10 gün əvvəl həbsxanadan çıxan 38 yaşlı Derya Kazmacı, dostunun evində ölü vəziyyətdə tapılıb.

Sonxeber.az türk mediasına istinadən xəbər verir ki, yaşayış yeri olmayan Kazmacı bir müddətdir dostu Rüstəm O.-nun evində qalırmış.

Hadisə bu gün saat 10:00 radələrində Kepez rayonunun Əmək məhəlləsində, üçmərtəbəli binanın birinci mərtəbəsində yerləşən mənzildə baş verib. Mağazada mühafizəçi işləyən Rüstəm O. səhər evə qayıdarkən, yanında qalan Derya Kazmacını yerə üzüüstü yıxılmış və hərəkətsiz vəziyyətdə görüb. O, dərhal 112 Təcili Yardım Mərkəzinə zəng edib.

Əraziyə polis və təcili tibbi yardım əməkdaşları cəlb olunub. Həkimlər Kazmacının həyatını itirdiyini müəyyənləşdiriblər. Bələdiyyə həkiminin ölümü şübhəli hesab etməsi səbəbilə hadisə yerinə istintaq qrupu göndərilib.

Araşdırma zamanı qadının qaldığı otaqda şpris və narkotik maddə aşkarlanıb. Tapılan əşyalar polis tərəfindən dəlil torbasına yerləşdirilib. Kazmacının meyiti otopsiya üçün Antalya Ədli Tibb İnstitutunun morquna aparılıb.

Telegramda izləyin