Qardaş faciəsi – kişi bıçaqla öz qardaşını qətlə yetirdi

Türkiyənin Qaziantep şəhərində ailə münaqişəsi qanla nəticələnib.

Sonxeber.az türk mediasına istinadən xəbər verir ki, qardaşlar arasında uzun müddətdir davam edən ədavət bu dəfə faciə ilə bitib – 40 yaşlı Yaşar Tüzel, 45 yaşlı böyük qardaşı Mehmet Tüzeli bıçaqla qətlə yetirib.

Hadisə dünən günorta saatlarında şəhərin Göllüce məhəlləsində baş verib. Məlumata görə, aralarında narazılıq olan qardaşlar evlərinin qarşısında mübahisəyə başlayıblar. Qısa müddətə gərginləşən mübahisə davaya çevrilib.

Dava zamanı Yaşar Tüzel cibindəki maket bıçağını çıxararaq qardaşının boğazına və bədəninin bir neçə hissəsinə zərbə endirib. Ağır yaralanan Mehmet Tüzel təcili yardım maşını ilə xəstəxanaya çatdırılsa da, həkimlərin müdaxiləsinə baxmayaraq həyatını itirib.

Hadisədən sonra qaçan Yaşar Tüzel, Asayiş Şöbəsinin Cinayət Axtarış Bürosu əməkdaşları tərəfindən qısa müddətdə saxlanılıb. Onun psixoloji problemlərinin olduğu iddia edilir. Polis bölməsində ifadəsi alınan Yaşar Tüzel daha sonra məhkəməyə göndərilib.

Hadisə anına aid mobil telefon görüntüləri də üzə çıxıb. Kadrlarda Yaşar Tüzelin qardaşını dəfələrlə bıçaqladığı, onları ayırmaq istəyən analarını təpiklə vuraraq yerə yıxdığı anlar əks olunub.

Qaziantep polisi hadisə ilə bağlı istintaqın davam etdiyini bildirib.

Telegramda izləyin