Dəhşətli hadisə: Cütlük qızlarının ad günündən sonra isti su dolu vannada ölü tapılıb

Braziliyada ordu üzvü olan Jeferson Luiz Sagaz (37) və həyat yoldaşı, manikür salonu sahibi Ana Karolina Silva (41), qızlarının ad gününü qeyd etdikdən bir neçə saat sonra vannada ölü tapılıblar.

Sonxeber.az xarici mediaya istinadən xəbər verir ki, cütlük əvvəlcə ad gününü bir məkanda qeyd edib, daha sonra gecə klubuna yollanıb. Gecə yarısı isə Santa-Katarina ştatının São José şəhərindəki "Dallas" motelinə yerləşiblər. Lakin ertəsi səhər onlar kiçik qızlarını götürmək üçün gəlmədikdə, yaxınları narahat olaraq polisə müraciət edib.

Hadisə yerinə gələn hüquq-mühafizə orqanları, cütlüyü otağın hamam hissəsində, 50°C temperaturda isti su ilə dolu vannada cansız vəziyyətdə aşkarlayıb. Otaqda işlək vəziyyətdə olan bir isitici cihaz da tapılıb.

Santa-Katarina Əyalət Polis İdarəsinin araşdırmasına əsasən, ölüm elektrik cərəyanı, boğulma və ya karbonmonoksit zəhərlənməsi nəticəsində baş verməyib. Polis rəisi Felipe Simão Gomes açıqlamasında bildirib:

"Araşdırmalar göstərir ki, ölüm qəfil baş verib və üçüncü şəxsin müdaxiləsi olmayıb. Lakin bədənlərdə aşkarlanan bəzi maddələr diqqət çəkicidir."

Toksikoloji hesabatına görə, həm Jefersonun, həm də Ana Karolinanın qanında yüksək miqdarda alkoqol və kokain aşkarlanıb. Mütəxəssislər, bu maddələrin isti suyun təsiri ilə birlikdə ani ürək tutmasına səbəb ola biləcəyini ehtimal edirlər.

Baş tibbi ekspert Andressa Boer Fronza hadisə ilə bağlı bildirib:

"Ölümlər, orqanizmdə olan xarici maddələr və yüksək temperatur nəticəsində yaranan həddindən artıq maye itkisi və orqan çatışmazlığı səbəbindən baş verib."

Cütlük təxminən 20 ildir evli olub və tanışları onları mehriban, ailə dəyərlərinə bağlı valideynlər kimi tanıyıblar. Onların keçmişində zorakılıq və ya cinayət hadisəsinə rast gəlinməyib.

Ana Karolinanın ailəsi isə, onun müntəzəm şəkildə narkotik istifadə etdiyini təkzib edib, maddənin ona zorla verilmiş ola biləcəyini iddia edir.

Bu faciədən sonra cütlüyün 4 yaşlı qızı yaxın qohumlarının himayəsinə verilib. Kiçik qız, ad gününü qeyd etdikdən bir neçə saat sonra valideynlərini itirib.

Qeyd edək ki, bu hadisə bir müddət əvvəl Rumıniyada yaşanan bənzər faciəni xatırladıb. Həmin vaxt 22 yaşlı bir qadın, doğum gününü qeyd etdikdən sonra isti su dolu vannada ürək tutmasından dünyasını dəyişmişdi.

Telegramda izləyin