Kişi arvadını güllələyib intihar etdi

Denizlinin Pamukkale rayonunun İncilipınar məhəlləsində faciə baş verib.

Sonxeber.az türk mediasına istinadən xəbər verir ki, 42 yaşlı Tunay Acarla bir ay əvvəl evləndiyi həyat yoldaşı 44 yaşlı Keziban Pars arasında spirtli içki qəbul etdikdən sonra mübahisə yaranıb.

Mübahisə zamanı Tunay Acar ov tüfəngi ilə həyat yoldaşını başından vuraraq qətlə yetirib. Daha sonra o, eyni silahla özünə atəş açaraq intihar edib.

Hadisə barədə məlumat, atasına bir müddət əlaqə saxlaya bilməyən Arda Acarın 112 Təcili Çağrı Mərkəzinə müraciəti nəticəsində üzə çıxıb. Əraziyə gələn polis qapının açılmadığını görərək çilingirin köməyi ilə mənzilə daxil olub.

Evin içərisində cütlüyün cansız bədənləri qan içində aşkar edilib. Təcili tibbi yardım əməkdaşları onların hadisə yerində həyatlarını itirdiyini müəyyənləşdiriblər.

Cütlüyün bir ay əvvəl evləndiyi və münasibətlərinin normal olduğu bildirilib.

Hadisə yerində aparılan araşdırmalardan sonra meyitlər incələnmə üçün Denizli Ədli Tibb Qurumu Qrup Başqanlığının morquna aparılıb.

Faktla bağlı istintaq davam edir.

Telegramda izləyin