Əvvəlcə küçədəki itə, sonra yoldan keçən cütlüyə atəş açdı

İzmirin Erik məhəlləsində faciəvi hadisə baş verib.

Sonxeber.az türk mediasına istinadən xəbər verir ki, M.Ö. adlı şəxs toyuqlarını yediyi iddia edilən sahibsiz itin üzərinə tüfənglə atəş açıb. Lakin tüfəngdən çıxan güllələr təsadüfən yoldan keçən cütlüyə dəyib. Hadisə nəticəsində qadın həyatını itirib, kişi isə yaralanıb.

İddialara görə, M.Ö. evində olan tüfəngi götürərək həyətə çıxıb və sahibsiz itə nişan alaraq tətiki çəkib. Bu zaman tüfəngdən çıxan güllələr yoldan keçən Adem İ. və həyat yoldaşı Şenay İ.-yə isabət edib.

Hadisəni görən qonşular dərhal hadisə barədə təcili tibbi yardım və jandarma əməkdaşlarına məlumat veriblər. Yaralı cütlük təcili yardım maşını ilə Beydağ Dövlət Xəstəxanəsinə aparılıb. Vəziyyəti ağır olan Şenay İ. daha sonra Ödemiş Dövlət Xəstəxanəsinə köçürülüb, lakin həkimlərin bütün səylərinə baxmayaraq, onun həyatını xilas etmək mümkün olmayıb.

Hadisədən sonra M.Ö. hadisədə istifadə etdiyi tüfənglə birlikdə polis əməkdaşları tərəfindən saxlanılıb. Faktla bağlı istintaq davam edir.

Telegramda izləyin