Keçmiş arvadını bıçaqla hədələyən kişi 3 uşağını girov götürdü – DƏHŞƏTLİ HADİSƏ

Türkiyənin Aksaray şəhərində ailə mübahisəsi faciəvi anlara səbəb olub.

Sonxeber.az türk mediasına istinadən xəbər verir ki, bir müddət əvvəl həyat yoldaşından boşanan Süheyl İ. uşaqlarını görmək bəhanəsi ilə keçmiş arvadı Hasrət K.-nın Taşpazar məhəlləsindəki evinə gəlib.

Evin içərisində mübahisəyə başlayan Süheyl İ. keçmiş arvadını döyüb, daha sonra mətbəxdən götürdüyü bıçaqla onun üstünə hücum edib. Qorxuya düşən qadın evdən qaçaraq 112 Təcili Çağrı Mərkəzinə məlumat verib.

Hadisə yerinə polis və təcili tibbi yardım əməkdaşları cəlb olunub. Polis evə girmək istəsə də, kişi qapını açmayıb. Daha sonra 3 uşağını yanına alaraq evin balkonuna çıxan Süheyl İ. keçmiş həyat yoldaşının geri dönməsini tələb edib.

Hadisə zamanı şok keçirən qadına təcili yardım maşınında tibbi yardım göstərilib. Bu vaxt isə balkonda göz yaşları içində qalan uşaqlar "Ana, nə olar gəl!" deyə fəryad ediblər.

Polis uşaqları xilas etmək üçün hadisə yerinə xilasedici briqadasını çağırıb. Onlar əvvəlcə uşaqları şişmə döşəyə atlatmaqla xilas etməyə çalışıblar. Lakin Süheyl İ. balkondakı stəkan, stul kimi əşyaları aşağı ataraq polis və yanğınsöndürənləri uzaqlaşdırmağa çalışıb.

Aksaray Respublika Prokurorluğunun göstərişi ilə hərəkətə keçən polis, koç başı ilə mənzilin qapısını sındıraraq içəri daxil olub. Uşaqlar təhlükəsiz şəkildə xilas edilib, Süheyl İ. isə zərərsizləşdirilərək həbs olunub.

Şəxs tərs qandal taxılmaqla mənzildən çıxarılıb və polis bölməsinə aparılıb. Hadisə ilə bağlı Aksaray Respublika Prokurorluğu tərəfindən istintaq başladılıb.

Telegramda izləyin