"12-ci Zirvə Görüşünün məhz Qəbələdə keçirilməsi Azərbaycanın Türk dünyasında strateji birləşdirici rolunun bariz göstəricisidir" - DEPUTAT

"Türk Dövlətləri Təşkilatının Dövlət Başçıları Şurasının 12-ci Zirvə Görüşü türkdilli ölkələr arasında çoxşaxəli əməkdaşlığın yeni mərhələsinə keçidi təmin edən mühüm tarixi hadisədir. İlk növbədə qeyd edim ki, Azərbaycan Respublikasının Prezidenti İlham Əliyevin təşəbbüsləri və ardıcıl fəaliyyəti Türk dünyasında həmrəyliyin möhkəmlənməsinə, təşkilat çərçivəsində əməkdaşlığın strateji səviyyəyə yüksəlməsinə mühüm töhfə vermişdir. Prezident İlham Əliyevin liderliyi ilə Azərbaycan Türk Dövlətləri Təşkilatının inkişafında fəal mövqe nümayiş etdirərək ortaq dəyərlərin, siyasi və iqtisadi inteqrasiyanın dərinləşməsində aparıcı rol oynamışdır".

Bu sözləri Sonxeber.az-a Milli Məclisin deputatı Mahir Süleymanlı danışıb.

O, açıqlamasında qeyd edib ki, Qəbələdə keçirilən 12-ci Zirvə Görüşü siyasi dialoqun daha da güclənməsinə, iqtisadi inteqrasiyanın dərinləşməsinə və birgə strateji layihələrin həyata keçirilməsinə real təkan verəcəkdir:

"Eyni zamanda, mədəni-humanitar sahədə əlaqələrin genişlənməsi, ortaq tarixi və mənəvi dəyərlərin qorunması və inkişaf etdirilməsi baxımından da xüsusi əhəmiyyət daşıyır. Zirvə həmçinin Türk Dövlətləri Təşkilatının regional sülhə, təhlükəsizliyə və yeni qlobal çağırışlara qarşı ortaq mövqeyinin formalaşmasına mühüm töhfə verir.

Qəbələdə qəbul ediləcək qərarların Türk dünyasının birliyinə, sabitliyinə və qlobal miqyasda nüfuzunun artmasına əhəmiyyətli şəkildə xidmət edəcəyinə inanırıq. 12-ci Zirvə Görüşünün məhz Qəbələdə keçirilməsi Azərbaycanın Türk dünyasında strateji birləşdirici rolunun və regional sabitliyin təmin olunmasında mühüm mövqeyə malik olmasının bariz göstəricisidir".

Vüsalə İbrahimli

Telegramda izləyin