Yeni tikilən tələbə yataqxanasında problemlər: Borular partladı, istilik yoxdur

Bilecikdə 2019-cu ildə 368 milyon 800 min TL dəyərində tenderlə tikintisinə başlanılan və 20 min kvadratmetr ərazidə inşa edilən Kredi və Yurtlar Qurumu (KYK) nəzdindəki 2 min nəfərlik tələbə yataqxanasının tikintisi yekunlaşıb. Lakin yataqxanaya yerləşən ilk tələbələr gördükləri mənzərə qarşısında şoka düşüblər.

Sonxeber.az türk mediasına istinadən xəbər verir ki, yeni istifadəyə verilən binada su borularının partlaması nəticəsində bəzi otaqları su basıb. Otaqlarda təmir işlərinə başlanıldığı bildirilsə də, tələbələr vəziyyətə etirazlarını ifadə ediblər.

Bundan əlavə, yataqxananın ətrafında abadlıq işlərinin tamamlanmaması səbəbindən tələbələr palçıq içində qalaraq hərəkət etməkdə çətinlik çəkirlər.

Tələbələr, otaqlarda isti suyun da olmadığını vurğulayıb, yuyunmaq üçün köhnə yataqxana binasına getməyə məcbur olduqlarını deyiblər.

Hadisə tələbə və valideynlər arasında narazılıq yaradıb. Onlar məsul qurumlardan problemin tez bir zamanda həll edilməsini tələb edirlər.

Telegramda izləyin