Dənizdə naməlum kişi meyiti tapıldı

Antalyada dənizdə kimliyi müəyyən edilməyən bir kişinin meyiti aşkarlanıb.

Sonxeber.az türk mediasına istinadən xəbər verir ki, həmin şəxsin sıldırım qayalıqlardan yıxıldığı güman edilir. Meyit kimliyinin müəyyənləşdirilməsi üçün Ədli Tibb Qurumuna göndərilib.

Hadisə səhər saat 08:30 radələrində Muratpaşa rayonunun Yeşilbahçe məhəlləsində, Lara prospektində yerləşən Falez-2 parkı sahilində baş verib. Məlumata görə, səhər saatlarında dəniz üzərində hərəkətsiz bir şəxsi görən vətəndaşlar dərhal 112 Təcili Yardım Mərkəzinə məlumat veriblər.

Əraziyə Antalya Polis İdarəsinin Dəniz Limanı Şöbəsi və Sahil Mühafizəsi Komandanlığına məxsus qayıqlar cəlb olunub. Əraziyə çatan dəniz polisi və sahil mühafizəsi əməkdaşları su üzərindəki kişi meyitini qayığa alaraq Yat Limanına gətiriblər.

Burada hazır gözləyən təcili tibbi yardım işçilərinə təhvil verilən meyitin təxminən 30 yaşlarında bir kişiyə məxsus olduğu bildirilib. Onun üzərində şəxsiyyətini müəyyənləşdirəcək hər hansı sənəd tapılmayıb.

Hadisə yerində ilkin araşdırmadan sonra meyit Antalya Ədli Tibb Qurumu morquna aparılıb. Ölümün dəqiq səbəbi aparılacaq ekspertizadan sonra müəyyən olunacaq.

Telegramda izləyin