"Mədəni müstəvidə isə Qəbələ Zirvəsi türk dünyasının ortaq kimliyinin daha da gücləndirilməsi baxımından simvolik bir hadisədir" - DEPUTAT

"7 oktyabr 2025-ci ildə Qəbələdə keçirilən Türk Dövlətləri Təşkilatının Dövlət Başçıları Şurasının 12-ci Zirvə görüşü, təkcə diplomatik hadisə deyil, türk dünyasının gələcək taleyində mühüm dönüş nöqtəsidir. Qədim Qəbələnin ev sahibliyi etdiyi bu zirvə, bir millətin müxtəlif dövlətlər şəklində yaşasa da, bir ideyanın — Türk birliyinin — ətrafında birləşməsinin canlı sübutudur".

Bu sözləri Sonxeber.az-a Milli Məclisin deputatı Aydın Hüseynov danışıb.

O, açıqlamasında qeyd edib ki, bu görüş, son illər ərzində Türk Dövlətləri Təşkilatının fəaliyyətində müşahidə edilən yeni mərhələnin məntiqi davamı kimi dəyərləndirilə bilər:

"Əgər əvvəllər bu əməkdaşlıq daha çox mədəni və humanitar çərçivədə keçirilirdisə, indi artıq siyasi, iqtisadi və təhlükəsizlik müstəvisinə keçid açıq şəkildə hiss olunur. Azərbaycan Prezidenti İlham Əliyevin ev sahibliyi etdiyi zirvə, türk dövlətləri arasında enerji, nəqliyyat, ticarət və müdafiə sənayesi sahələrində strateji əməkdaşlığın dərinləşməsi baxımından xüsusi əhəmiyyət daşıyır.

Qəbələdə səsləndirilən çıxışlarda təkcə dostluq və qardaşlıqdan danışılmadı — konkret planlar, layihələr, ortaq iqtisadi məkanların yaradılması və regional inteqrasiyanın gücləndirilməsi məsələləri gündəmə gətirildi. Bu, Türk dövlətlərinin bir-birinə təkcə tarix və dil baxımından deyil, həm də real iqtisadi maraqlar baxımından bağlandığını göstərir. Orta Dəhliz layihəsi, enerji əməkdaşlığı, birgə investisiya fondlarının yaradılması kimi təşəbbüslər artıq reallaşmaq mərhələsinə daxil olub.

Mədəni müstəvidə isə Qəbələ Zirvəsi türk dünyasının ortaq kimliyinin daha da gücləndirilməsi baxımından simvolik bir hadisədir. Qədim Qafqazın ürəyində keçirilən bu görüş, həm də tarixi köklərimizə qayıdışın, eyni zamanda müasir dövrdə birgə gələcəyə inamın ifadəsidir.

Bu Zirvənin nəticələri göstərir ki, Türk Dövlətləri Təşkilatı artıq regional formatdan qlobal təsir mərkəzinə çevrilmək yolundadır. Azərbaycan isə bu birliyin həm coğrafi, həm siyasi, həm də mənəvi mərkəzi rolunu oynayır. Qəbələdə qəbul olunan qərarlar, təkcə bu günün deyil, gələcək onilliklərin Türk birliyinin əsasını möhkəmləndirəcək sənədlər kimi tarixə düşəcək".

Vüsalə İbrahimli

Telegramda izləyin