Polis paltarı geyinən şəxs uşağa atəş açdı – hadisə anı kameraya düşdü - VİDEO

Türkiyənin Adana şəhərinin Yüreğir rayonunda qəribə və qorxulu hadisə baş verib.

Sonxeber.az türk mediasına istinadən xəbər verir ki, başında kaska olan və avtomobilinə polis siqnal işığı (çakar) quraşdıran bir şəxs, özünü polis kimi təqdim edərək məhəllə sakinlərini saxlayıb, onların üstünü axtarıb. Daha sonra isə küçədə gedən bir uşağa silahla atəş açıb.

Hadisə gecə saatlarında Yüreğir rayonunun 19 Mayıs məhəlləsində baş verib. Şübhəli şəxs polis təəssüratı yaratmaq üçün avtomobilinin ön hissəsinə polis maşını işığı yerləşdirib və ara küçələrdə gəzərək gəncləri dayandırıb, guya yoxlama aparıb.

Sonradan avtomobilinə minən həmin şəxs, hərəkət zamanı yoldan keçən bir uşağa atəş açıb. Qorxuya düşən uşaq qaçaraq hadisə yerindən uzaqlaşıb. Bütün bu anlar ərazidəki təhlükəsizlik kameralarına düşüb.

Məhəllə sakinlərinin şikayəti əsasında polis hadisə ilə bağlı araşdırmaya başlayıb və şübhəlinin kimliyinin müəyyən edilərək saxlanılması üçün əməliyyat aparılır.

Telegramda izləyin