Bələdiyyə sədrinin qardaşı evində ölü tapıldı

Türkiyənin Batman vilayətinin Kozluk rayonunda bələdiyyə sədri Mehmet Veysi Işığın qardaşı Mehmet Salim Işık evində silahla vurulmuş halda tapılıb.

Sonxeber.az türk mediasına istinadən xəbər verir ki, hadisə Sağlık məhəlləsində, iki mərtəbəli evin birinci mərtəbəsində baş verib.

Axşam saatlarında evdən gələn atəş səsini eşidən qonşular dərhal polisə və təcili tibbi yardıma xəbər veriblər. Əraziyə gələn qruplar 66 yaşlı Mehmet Salim Işığı ağır yaralı vəziyyətdə tapıblar. O, ilkin tibbi yardım göstərildikdən sonra Kozluk Dövlət Xəstəxanasına aparılıb, lakin həkimlərin səylərinə baxmayaraq, həyatını xilas etmək mümkün olmayıb.

Meyit Batman Təhsil və Araşdırma Xəstəxanasının morquna göndərilib.

İlkin məlumatlara görə, Işığın silahını təmizləyərkən təsadüfən özünü vurduğu ehtimal edilir.

Hadisə ilə bağlı polis tərəfindən araşdırma başladılıb.

Telegramda izləyin