Yol nəzarəti zamanı "Atam prokurordur" deyən qadın, polisləri hədələdi

Türkiyənin Aksaray şəhərində gecə saatlarında keçirilən yol nəzarəti zamanı maraqlı və gərgin hadisə yaşanıb.

Sonxeber.az türk mediasına istinadən xəbər verir ki,polis əməkdaşlarının saxladığı alkoqollu sürücü və onunla birlikdə olan qadın, yoxlama zamanı polislərə qarşı müqavimət göstərib və mübahisə yaradıb.

Hadisə zamanı qadın, həm polislərə, həm də hadisəni çəkən jurnalistlərə təhqiramiz ifadələr işlədib. O, polisləri hədələyərək "Sizə güllə atacağam! Mənim atam prokurordur!" deyə qışqırıb.

Ekol TV-nin Aksaray müxbiri Başak Deniz Kılıçdağının verdiyi məlumata görə, sürücü polisin xəbərdarlıqlarına baxmayaraq təslim olmaqdan imtina edib, bu da qısa müddətli qarşıdurmaya səbəb olub.

Maraqlı məqam odur ki, hadisə zamanı sürücünün atası da orada olub və oğlu polislərə qarşı çıxarkən "Afərin, oğlum!" sözləri ilə onu dəstəkləyib.

Polis əməkdaşlarının müdaxiləsindən sonra vəziyyət nəzarətə alınıb. Alkoqollu sürücü tərs qandal vurularaq saxlanılıb. Hadisə ilə bağlı araşdırma davam edir.

Telegramda izləyin