Şəhid məzarlarına edilən hörmətsizlik böyük narazılıq doğurub

Erzurumun Narman rayonunda 93-cü illər müharibəsində (1877–1878 Osmanlı–Rusiya müharibəsi) şəhid olan Oltulu Dağgirli Daştan Əfəndi və onun silahdaşlarının məzarlarının dağıdılması ictimaiyyətdə böyük narazılıq doğurub.

Sonxeber.az türk mediasına istinadən xəbər verir ki, 93-cü illər müharibəsi zamanı Qüvvəyi-Milliyə komandiri kimi fəaliyyət göstərən, Oltu rayonundan Narman istiqamətinə 100 atlı və piyada ilə köməyə gedən Dağgirli Daştan Əfəndi Şəkərli kəndində şəhid olub. Onun və beş naməlum şəhidin Narman rayonunun Mahmut Çavuş məhəlləsində yerləşən məzarı naməlum şəxslər tərəfindən qazılaraq dağıdılıb.

Hadisəni təxminən iki ay əvvəl məzarı ziyarətə gedən Daştan Əfəndinin nəvəsi Gülten Gürbüz aşkar edib və dərhal Narman Jandarm Komandanlığına məlumat verib. Əraziyə gələn jandarma qüvvələri faktla bağlı araşdırmaya başlayıb. İlkin araşdırmalar zamanı türbənin daş divarlarının içərisinə girilərək qəbrin məqsədli şəkildə qazıldığı müəyyən edilib.

Hadisə bölgə sakinlərinin sərt etirazına səbəb olub. Yerli əhali "Bu, sadəcə bir məzar deyil, şəhidlərimizin müqəddəs xatirəsinə edilən hörmətsizlikdir" – deyə etirazlarını bildirib. Sakinlər həmçinin məzarlığın bərpa edilərək yenidən abadlaşdırılmasını tələb ediblər.

Hadisə ilə bağlı Oltu Respublika Prokurorluğu tərəfindən istintaq başladılıb. Tarixi mənbələrə görə, Birinci Dünya müharibəsi zamanı Oltudan cəbhəyə dəstək üçün gedən Qüvvəyi-Milliyə Komandiri Dağgirli Daştan Əfəndi və beş silahdaşı döyüşdə şəhid olmuş və həmin ərazidə dəfn edilmişdilər. Onların xatirəsinə tikilən türbə bu günədək bölgə əhalisi tərəfindən ziyarət edilirdi.

Telegramda izləyin