1,5 yaşlı uşağın boğazını kəsən şəxsə 44 ilədək həbs tələbi

Eskişehirdə dostunun 1,5 yaşlı oğlunun boğazını bıçaqla kəsən və daha sonra evini yandıraraq intihara cəhd edən Habib Kara barəsində 44 ilə qədər həbs cəzası istənilib.

Sonxeber.az türk mediasına istinadən xəbər verir ki, hadisə bu ilin fevral ayında baş verib. Şəhərdə qənnadı sexi işlədən Habib Kara, dostu İsmail Y.-nin evinə gedərək onun azyaşlı oğlunu qucağına alıb və bıçağı boğazına dirəyib. O, İsmail Y.-dən qardaşı Nurettin Kara-nı zənglə hədələyərək 10 milyon lirə tələb etməsini istəyib. Lakin Nurettin Kara pulu olmadığını bildirərək danışığı dayandırıb. Bu zaman İsmail Y. uşağını xilas etməyə çalışarkən Habib Kara azyaşlının boğazını kəsib.

Hadisədən sonra Kara qaçaraq öz evinə gedib, təbii qazı açaraq binanı yandırmağa cəhd edib. Qonşular buna mane olsalar da, o, damda yanğın törədib və binadan tullanaraq intihara cəhd edib. Həm uşaq, həm də Kara ağır yaralı halda xəstəxanaya yerləşdirilib.

Müalicədən sonra saxlanılan Habib Kara məhkəmədə ifadə verərək, hadisəni xatırlamadığını və "özünə qarşı tələ qurulduğunu" iddia edib. Lakin prokuror, onun "azyaşlıya qarşı qəsdən adam öldürməyə cəhd", "soyğunçuluq" və "mülkiyyətə zərər vurma" maddələri ilə 23 ildən 44 ilə qədər həbs cəzasına məhkum edilməsini tələb edib.

Zərərçəkmiş uşağın valideynləri şübhəlinin ən ağır şəkildə cəzalandırılmasını istəyib. Anası bildirib ki, "uşağım hələ də qorxu içindədir, psixoloji müalicə alır".

Hadisə zamanı binanın yandırılmasına şahid olan qonşular isə Kara-nın həm binanı, həm də oradakı insanların həyatını təhlükəyə atdığını deyiblər.

Məhkəmənin növbəti iclasında qərar elan ediləcəyi gözlənilir.

Telegramda izləyin