Bələdiyyə işçisi həmkarını boğazından kəsərək öldürdü

Antalyanın Manavqat rayonunda bələdiyyə işçisi həmkarını boğazından bıçaqlayaraq öldürüb.

Sonxeber.az türk mediasına istinadən xəbər verir ki, hadisə oktyabrın 9-da baş verib. Manavqat Bələdiyyəsinin Təmizlik İdarəsində çalışan Gökhan Mutlu, həmkarları Nurullah G. və Mehmet Özkaynak ilə birlikdə səhər saatlarında zibil toplamağa çıxıb. Onlar Sülek–Hacısali yolu üzərində işləyərkən Mutlu, zibil maşınının sürücüsü Mehmet Özkaynakı boğazından bıçaqlayaraq qətlə yetirib.

Hadisə şahidi olan Nurullah G. ifadəsində bildirib ki, "Zibili almağa getdiyim vaxt maşından səslər eşitdim. Geri dönəndə kabinədə Gökhan ilə Mehmetin boğuşduğunu gördüm. Qapını açanda Mehmet oturacaqda hərəkətsiz idi, Gökhan isə qaçmışdı"

Cinayətdən sonra hadisə yerindən qaçan Gökhan Mutlu təxminən 5 kilometr uzaqda yerləşən Hacıobası kəndi yaxınlığındakı yol nəzarət məntəqəsinə gedərək polisə təslim olub.

Polis tərəfindən saxlanılan Mutlu ifadəsində həmkarının davranış və danışıq tərzindən narazı olduğunu, çox sürətli avtomobil idarə etdiyini və xəbərdarlıqlarına məhəl qoymadığını deyib. O, bu səbəbdən Mehmet Özkaynakı öldürməyi əvvəlcədən planlaşdırdığını və etdiyi əməldən peşman olmadığını etiraf edib.

Gökhan Mutlu məhkəmənin qərarı ilə həbs olunaraq Manavqat S Tipli Qapalı və Açıq Cəzaçəkmə müəssisəsinə göndərilib.

Hadisə ilə bağlı istintaq davam edir.

Telegramda izləyin