Dağdan sarımsaq yığdıqları üçün 30 min manat cərimə olundular

Tuncelinin Çemişgezek rayonuna bağlı Anıl kəndi yaxınlığında qoruma altında olan dağ sarımsağının qanunsuz yolla yığılması ilə bağlı polisə edilən məlumatdan sonra əməliyyat keçirilib.

Sonxeber.az türk mediasına istinadən xəbər verir ki, Tunceli Vilayət Jandarma Komandanlığının əməkdaşları bölgədəki bütün yolları bağlayaraq genişmiqyaslı axtarış və nəzarət tədbirləri həyata keçiriblər. Nəticədə şübhəli avtomobil saxlanılıb. Avtomobilə baxış zamanı 5 kisə içərisində təxminən 200 kiloqram dağ sarımsağı aşkarlanıb.

Sürücü saxlanılaraq, "təbiətə zərər vermə" maddəsi ilə 557 min lirə (təxminən 30 min manat) məbləğində inzibati cərimə olunub.

Qeyd edək ki, Tunceliyə xas olan dağ sarımsağı nadir və endemik bitki növü hesab olunur. Onun təbii mühitdən məqsədsiz və zamansız toplanması bu növün məhv olma təhlükəsini artırır.

Jandarma Komandanlığından verilən açıqlamada bildirilib ki, "Təbiəti qorumaq – gələcəyə nəfəs verməkdir" prinsipi ilə ətraf mühitin və bioloji müxtəlifliyin qorunması istiqamətində tədbirlər qətiyyətlə davam etdiriləcək.

Telegramda izləyin