Xəstəxanada şübhəli ölüm: tibb bacısı xəstə ilə dalaşıb, onu öldürdü

Türkiyənin Qaziantep şəhərində üç il əvvəl baş verən yol qəzası zamanı dizindən xəsarət alan 27 yaşlı Abdurrezzak Baysal, müalicə olunduğu özəl xəstəxanada müəmmalı şəkildə dünyasını dəyişib.

Sonxeber.az türk mediasına istinadən xəbər verir ki, qəzadan sonra diz sümüyü qırılan Baysalın ümumi vəziyyəti yaxşı idi və o, özəl xəstəxanada müalicə alırdı. Lakin bir müddət sonra reanimasiya şöbəsində həyatını itirib. Ailəsi bu ölümün şübhəli olduğunu bildirərək hüquq-mühafizə orqanlarına müraciət edib.

Aparılan istintaq nəticəsində məlum olub ki, xəstəxanada çalışan tibb bacısı Aslı Ersoy həkim göstərişi olmadan başqa bir xəstəyə aid əzələ boşaldıcı iynəni Baysala vurub. Ölüm səbəbini dəqiqləşdirmək üçün meyitə ekspertiza təyin olunub. Ədliyyə Tibb Qurumunun rəyinə əsasən, Baysalın ölümünə məhz həmin iynə səbəb olub. Hadisə ilə bağlı tibb bacısı Aslı Ersoy və Mustafa Çelik barəsində cinayət işi açılıb.

Qaziantep 3-cü Ağır Cəza Məhkəməsində keçirilən son iclasda ifadə verən xəstə baxıcısı Semihat Ö. bunları deyib:

"Reanimasiya otağına daxil olanda Aslı tibb bacısı ilə xəstə arasında mübahisə gedirdi. Xəstə onun üzünə tüpürdü, Aslı əsəbləşərək xəstənin ağzını bağladı və ‘İndi sənə nə edəcəyimi bilirsən’ dedi. Sonra başqa bir xəstəyə aid iynəni götürüb, ‘Mustafa, bunu Baysala vur’ dedi. Təxminən 5-6 dəqiqə sonra xəstə pisləşdi. 45 dəqiqə boyunca müdaxilə etdilər, sonra aralarında ‘öldü’ dedilər."

"Qardaşım sağlam idi, 10 gün sonra evə gətirəcəkdik"

Abdurrezzak Baysalın bacısı İpek Baysal hadisə ilə bağlı belə danışıb:

"Qardaşım yol qəzası keçirmişdi, yalnız dizində sınıq vardı. On gün reanimasiyada qaldı, sonra normal palataya keçdi. Hər şey qaydasında idi. Gecə saat 04:00-də xəstəxanədən zəng edib ‘Qardaşınız infarkt keçirdi, vəfat etdi’ dedilər. Səhər evə gətirəcəkdik, amma bizə tabutunu verdilər. Ədalət istəyirik."

Məhkəmə, ölümün vurulan iynə ilə birbaşa əlaqəsini müəyyənləşdirəcək yeni ekspertiza rəyinin təqdim olunmasını gözləmək üçün prosesi 3 dekabr tarixinə qədər təxirə salıb.

Telegramda izləyin