Küçədə jurnalistə hücum: iki nəfər saxlanıldı - VİDEO

İstanbulun Esenyurt rayonunda evinə gedən jurnalist Hakan Tosun küçədə iki nəfərin fiziki hücumuna məruz qalıb.

Sonxeber.az türk mediasına istinadən xəbər verir ki, hadisə Mehmet Akif Ersoy məhəlləsində baş verib. Məlumata görə, Hakan Tosun evinə doğru hərəkət edərkən hələlik naməlum səbəbdən iki şəxs tərəfindən döyülüb. Hücumdan sonra şübhəlilər hadisə yerindən qaçıblar.

Əraziyə çağırılan təcili tibbi yardım və polis qrupları yaralıya ilkin tibbi yardım göstəriblər. Sağlıq işçiləri Hakan Tosunun ağır yaralandığını müəyyən edərək onu təcili tibbi yardım maşını ilə xəstəxanaya aparıblar.

Polis əməkdaşlarının apardığı əməliyyat nəticəsində hücum edən şəxslər – A.M. (18 yaş) və A.Ş. (24 yaş) qısa zamanda saxlanılıb. Onlar ifadələri alındıqdan sonra məhkəməyə çıxarılıb və həbs edilərək cəzaçəkmə müəssisəsinə göndəriliblər.

Hadisə ilə bağlı araşdırma davam edir.

Telegramda izləyin