50 avtomobilin üzərinə insan qanı ilə xaç simvolu çəkdilər

Almaniyanın Hanau şəhərində gecə saatlarında baş verən hadisə ölkə üzrə ciddi narahatlıq yaradıb.

Sonxeber.az xarici mediaya istinadən xəbər verir ki, şəhərdə onlarca avtomobilin, poçt qutularının və bina divarlarının üzərinə insan qanı ilə xaç simvolu çəkildiyi müəyyən edilib.

Polis sözçüsü Tomas Leypoldun açıqlamasına görə, çərşənbə gecəsi bir vətəndaş avtomobilinin kapotunda qırmızı rənglə çəkilmiş xaç işarəsini görərək dərhal polisə məlumat verib. Hadisə yerinə çatan polis qrupları ətraf ərazilərdə geniş araşdırma aparıb.

Laboratoriya testlərinin nəticələrinə əsasən, avtomobillərin üzərindəki qırmızı maddənin insan qanı olduğu təsdiqlənib. Araşdırmalar zamanı şəhər üzrə təxminən 50 avtomobilin eyni şəkildə işarələndiyi ortaya çıxıb.

Polis hadisənin motivasiyasının və istifadə olunan qanın haradan əldə edildiyinin hələ müəyyən olunmadığını bildirib. Hazırda hər hansı fiziki zərər və ya hücum faktı qeydə alınmayıb. Leypold, hadisənin arxasında duran səbəbin "tamamilə naməlum" olduğunu vurğulayıb.

Qeyd edək ki, Almaniyada nasist simvollarının ictimai yerlərdə istifadəsi qanunla qadağandır. Hadisə ilə bağlı istintaq "əmlaka ziyan vurma" və "konstitusiyaya zidd təşkilatların simvollarından istifadə" maddələri üzrə davam etdirilir.

Telegramda izləyin