Bağçalardakı özbaşınalıqla bağlı valideynlər kimə müraciət etsin? - RƏSMİ

Bir neçə gün öncə sosial şəbəkələrdə yayılan videogörüntülər valideynlərdə narahatlıq doğurub. Belə ki, nahar yeməyi zamanı valideynlərdən biri bağçaya daxil olaraq çəkiliş edib. Valideyn iddia edir ki, dövlətin Məktəbəqədər təhsil müəssisələrinə ayırdığı ərzaq olduğu kimi uşaqlara verilmir. Bir çox bağçalarda isə ümumiyyətlə valideynlərin içəri daxil olmasına icazə verilmir.

Bəs valideynlər narazı qaldıqları dövlət bağçası ilə bağlı hansı quruma müraciət etməlidir? Belə ki əgər valideynlər bağçada qidalanma ilə bağlı narazılıqları, şübhələri varsa, amma bunu bağçaya girə bilmədikləri üçün sübut edə bilmirlərsə, hansı quruma şikayət edib, yoxlanışa gedilməsini tələb edə bilərlər?

Mövzuyla bağlı Məktəbəqədər və ümumi təhsil üzrə dövlət agentliyindən Sonxeber.az -ın sorğusuna cavab olaraq bildirildi ki, bu məsələlərə Agentlik tərəfindən həssaslıqla yanaşılır və daim diqqət mərkəzində saxlanılır:

"Məktəbəqədər təhsil müəssisələrində təlim-tədris prosesi ilə yanaşı, uşaqların sağlamlığı, təhlüksəziliyi və qidalanması prioritetlərimizdəndir. Bu məsələlərə Agentlik tərəfindən həssaslıqla yanaşılır və daim diqqət mərkəzində saxlanılır.

Bildiririk ki, məktəbəqədər təhsil müəssisələrində qidalanma normaları Nazirlər Kabinetinin müvafiq qərarlarına əsasən tənzimlənir və təşkil edilir. Qidalanma gün ərzində bağçaların iş saatlarına görə təmin edilir.

İllik fəaliyyət planına uyğun olaraq Məktəbəqədər və Ümumi Təhsil üzrə Dövlət Agentliyi tərəfindən məktəbəqədər təhsil müəssisələrində həyata keçirilən nəzarət tədbirləri sistemli və ardıcıl şəkildə davam etdirilir, vətəndaş və valideyn müraciətlərinə xüsusi həssaslıqla yanaşılır.

Məktəbəqədər təhsil müəssisələrinin fəaliyyəti ilə bağlı təklif və şikayətləri olan şəxslər agentliyin vətəndaş xidmətləri mərkəzi, regional təhsil idarələri, eləcə də 146-2 çağrı mərkəzi ilə əlaqə yaratmaqla müraciət edə bilərlər".

Aysel Səfərzadə

Telegramda izləyin