Toyuğu yumazdan əvvəl bu təhlükəni bilin!

Bir çox insan toyuq ətini bişirməzdən əvvəl kranın altında yumağa üstünlük verir. Lakin mütəxəssislər bu vərdişin sağlamlıq üçün təhlükə yarada biləcəyi barədə xəbərdarlıq edirlər. Belə ki, çiy toyuğun yuyulması zamanı su sıçrantıları vasitəsilə bakteriyalar mətbəxin müxtəlif səthlərinə, qab-qacağa və digər qidalara yayıla bilər.

Ölkə.az yerli mediaya istinadən xəbər verir ki, Çiy toyuq ətində Salmonella və Campylobacter kimi qida zəhərlənməsinə səbəb olan bakteriyalar mövcud ola bilər. Bu mikroorqanizmlər təkcə kifayət qədər bişirilməmiş ətin istehlakı zamanı deyil, çiy toyuqla təmasda olmuş digər qidalar vasitəsilə də orqanizmə keçə bilər.

Araşdırmalara görə, toyuğun yuyulması bakteriyaları məhv etmir, əksinə, onların mətbəxdə yayılması riskini artırır. ABŞ Kənd Təsərrüfatı Departamentinin araşdırmasında toyuğu yuduqdan sonra çanağı təmizləyən hər yeddi nəfərdən birinin çanağında mikrobların qaldığı müəyyən edilib.

Bəzi insanlar toyuq ətini duzlu su, sirkə və ya limon suyu ilə yumağın bakteriyaları aradan qaldırdığını düşünür. Lakin bu üsullar mikrobların tam məhv edilməsinə zəmanət vermir. Ətin sabun və ya digər yuyucu vasitələrlə təmizlənməsi isə yolverilməzdir.

Mütəxəssislər bildirirlər ki, toyuq ətindəki təhlükəli bakteriyaların məhv edilməsinin ən etibarlı yolu onun düzgün bişirilməsidir. Bunun üçün ətin daxili temperaturu ən azı 74 dərəcəyə çatmalıdır.

Həmçinin çiy toyuqla təmasdan əvvəl və sonra əllər ən azı 20 saniyə sabunla yuyulmalı, ət üçün ayrıca doğrama taxtasından istifadə edilməlidir. Toyuğun təmas etdiyi mətbəx səthləri və qablar da diqqətlə təmizlənməlidir.

Telegramda izləyin