Regional kanalllar və internet televiziyaları Azerspace peykində niyə yayıma çıxa bilmir? - İQTİSADÇI AÇIQLADI

Azərbaycanın orbitdə iki telekommunikasiya peyki var. İlk peykimiz olan Azerspace 1 peyki 7 fevral 2013-cü ildə orbitə buraxılıb. Lakin ilk peykimizin orbitə buraxılmasından 13 ilə yaxın vaxt keçməsinə baxmayaraq, ölkədə yayımlanan regional kanallar və internet televiziyaları peykdə yayımlana bilmir.

Halbuki dünyanın heç bir ölkəsində elə bir şey yoxdur ki, ölkənin özünün telekommunikasiya peyki olsun və həmin ölkədə yayımlanan kanallar peyk vasitəsi ilə yayım həyata keçirə bilməsin. Məsələn, regional kanallardan Kəpəz TV, Qafqaz TV, İsmayilli TV, ARB Cənub, eləcədə internet televiziyalarından APA TV, SƏS TV, Biznes TV, TV 1 və s. kanallar hələdə peyk vasitəsi ilə yayım həyata keçirə bilmir.
Mövzu ilə bağlı iqtisadçı Natiq Cəfərli BiG.AZ-a açıqlamasında bildirdi ki, Azerspace peykində yayımlanmaq üçün qiymətlər bahadırsa, bu kommersiya məsələsidir. Onun sözlərinə görə, regional kanalların maliyyə vəziyyəti çox aşağıdır: "Ona görədə onlar yayım üçün ən ucuz peyk axtarışındadırlar. Türksat peyki isə daha ucuz qiymətlər təklif edir. Burda iki yanaşma ola bilər.

Birinci yanaşma ondan ibarətdir ki, dövlət özü qərar verməlidir ki, informasiya təhlükəsizliyi baxımından peykdə yayım üçün yerli kanallara üstünlük verilsin və aşağı tariflər olsun. İkinci yanaşma isə ondan ibarətdir ki, burda kommersiya məsələsini önə çəkəcəklər və deyəcəklərki, Azercosmos tariflərini özü müəyyən edir".

Telegramda izləyin