Yük maşınında təhlükəli mənzərə: Balaca qız uşağının yük yerində aparılması narazılıq yaratdı - VİDEO

Sakaryada avtomobil yolunda qeydə alınan görüntü sosial şəbəkələrdə geniş müzakirələrə səbəb olub.

Sonxeber.az türk mediasına istinadən xəbər verir ki, yolda hərəkətdə olan sürücü, yük maşınının yük yerində təhlükəli şəkildə aparılan kiçik bir qız uşağını görərək həmin anları mobil telefonla çəkib.

Görüntülərdə maşının sürücü kabinəsində 4-5 yetkin şəxsin oturduğu, azyaşlının isə təhlükəsizlik qaydalarına zidd olaraq arxa yük yerində aparıldığı açıq şəkildə görünür.

Hadisəyə şahid olan sürücü bu mənzərəyə etiraz edərək belə deyib:

"Balaca uşaqdır, buna bax da. Günahdır vallah. Bu balaca uşağı içəri oturtmayıblar, amma böyük-böyük yetkin adamları qabağa yerləşdiriblər…"

Kadrlar sosial şəbəkələrdə sürətlə yayılaraq istifadəçilər tərəfindən sərt şəkildə tənqid olunub. İnsanlar uşağın həyatını təhlükəyə atan belə məsuliyyətsiz davranışlara qarşı nəzarətin gücləndirilməsini tələb ediblər. Hadisə ilə bağlı rəsmi qurumlardan açıqlama verilib-verilmədiyi hələlik məlum deyil.

Telegramda izləyin