Ov zamanı faciə: Dostunu güllələdi

Afyonkarahisarda ova gedərkən avtomobildə güllələnən və aparıldığı xəstəxanada həyatını itirən şəxsin, məhəllə və bazar gözətçisi olan dostunun təsadüfən açdığı atəş nəticəsində öldüyü müəyyən edilib.

Sonxeber.az türk mediasına istinadən xəbər verir ki, əldə edilən məlumata görə, məhəllə muxtarı S.Y.A., məhəllə və bazar gözətçisi O.B., A.B. və Fatih Duru adlı dörd dost ov etmək üçün bir araya gəlib. Onlar avtomobillə ov edəcəkləri əraziyə gedərkən iddiaya görə, maşında olan tüfəklərdən biri qəfil atəş açıb. Tüfəngdən çıxan güllə Fatih Durunun boyun nahiyəsinə dəyib.

Dostlarının vurulduğunu görən şəxslər avtomobili Sultandağı Dövlət Xəstəxanasının qarşısına sürərək kömək istəyiblər. Lakin Fatih Duru burada göstərilən tibbi yardıma baxmayaraq həyatını itirib.

Hadisə ilə bağlı əraziyə gələn jandarma əməkdaşları avtomobilə ətraflı baxış keçirib və 3 nəfəri saxlayıb. Eyni zamanda avtomobildə olan tüfəklər də götürülüb. Aparılan araşdırma zamanı tüfəngdən güllə açan şəxsin məhəllə və bazar gözətçisi O.B. olduğu müəyyən edilib. Onun ifadəsində tüfəngi təsadüfən açdığını və dostunu bilmədən vurduğunu dediyi bildirilib.

Şəxslər jandarmadakı prosedurlardan sonra məhkəməyə göndərilib. Hadisə ilə bağlı araşdırma davam etdirilir.

Telegramda izləyin